2 October NO UPI Day : 2 ऑक्टोबरला महाराष्ट्रात यूपीआय बंद, व्यापारी फक्त कॅश व्यवहार स्वीकारणार; 'हे' आहे मुख्य कारण
Maharashtra Traders NO UPI Campaign: यूपीआय व्यवहारांवर लागणाऱ्या MDR चा अतिरिक्त आर्थिक भार व्यापाऱ्यांवर पडत असल्याने राज्यातील व्यापाऱ्यांनी 2 ऑक्टोबर रोजी NO UPI मोहीम राबवण्याचा निर्णय घेतला आहे.

मुंबई : डिजिटल पेमेंटचे मुख्य माध्यम असलेल्या यूपीआय (UPI) व्यवहारांवरील एमडीआर (MDR - Merchant Discount Rate) च्या मुद्द्यावरून राज्यातील व्यापारी वर्ग आक्रमक झाला आहे. एमडीआरच्या नावाखाली व्यापाऱ्यांवर अतिरिक्त आर्थिक भार टाकला जात असल्याचा आरोप करत, याविरोधात सामूहिक भूमिका मांडण्यासाठी 2 ऑक्टोबर रोजी राज्यभरात NO UPI - NO PAYMENT मोहीम राबवण्याचा निर्णय घेण्यात आला आहे.
महाराष्ट्र चेंबर ऑफ कॉमर्स, इंडस्ट्री अँड ॲग्रिकल्चरच्या (MACCIA) वतीने आयोजित करण्यात आलेल्या ऑनलाईन बैठकीत राज्यातील विविध व्यापारी संघटनांच्या पदाधिकाऱ्यांनी हा एकमुखाने निर्णय घेतला आहे.
Maharashtra Chamber Of Commerce : डिजिटल प्रणालीला विरोध नाही
महाराष्ट्र चेंबरचे अध्यक्ष रविंद्र माणगावे यांच्या अध्यक्षतेखाली ही महत्त्वपूर्ण बैठक पार पडली. यूपीआय हे डिजिटल पेमेंटचे अत्यंत महत्त्वाचे माध्यम असून चेंबरचा यूपीआयच्या (UPI) वापराला किंवा डिजिटल व्यवहारांना अजिबात विरोध नाही, असे स्पष्टीकरण या बैठकीत देण्यात आले.
मात्र, यूपीआय व्यवहारांवर आकारल्या जाणाऱ्या एमडीआरमुळे लहान-मोठ्या व्यापाऱ्यांच्या खिशावर अतिरिक्त आर्थिक ताण पडत आहे. हा आर्थिक भार व्यापाऱ्यांवर टाकला जाऊ नये, हीच व्यापारी वर्गाची मुख्य मागणी असल्याचे चेंबरने अधोरेखित केले आहे.
2 October No UPI Day Rules : 2 ऑक्टोबरला व्यापारी काय करणार?
आपली एकजूट आणि सामूहिक भूमिका शासनापर्यंत पोहोचवण्यासाठी व्यापाऱ्यांनी खालील उपक्रम राबवण्याचे ठरवले आहे:
केवळ कॅश व्यवहार : 2 ऑक्टोबर रोजी सर्व व्यापारी बांधव यूपीआय पेमेंट पूर्णपणे बंद ठेवून केवळ रोख (Cash) पेमेंटचा पर्याय स्वीकारतील.
सोशल मीडिया कॅम्पेन : व्यापारी बांधव 2 ऑक्टोबर रोजी आपल्या WhatsApp DP, Facebook, Instagram Story आणि Status वर “NO UPI - NO PAYMENT | ZERO MDR” असा मेसेज ठेवून मोहिमेला पाठिंबा दर्शवतील.
एकजूट दाखवण्याचे आवाहन : “एक दिवस, एक भूमिका, एकजूट NO UPI - NO PAYMENT” या सूत्राखाली राज्यातील सर्व लहान-मोठ्या दुकानदारांनी व व्यापाऱ्यांनी यात मोठ्या संख्येने सहभागी व्हावे, असे आवाहन करण्यात आले आहे.
Zero MDR Demand Merchants : झिरो एमडीआरची प्रमुख मागणी
यूपीआय व्यवहारांवर झिरो एमडीआर (Zero MDR) धोरण लागू राहावे, अशी व्यापाऱ्यांची मुख्य मागणी आहे. 2 ऑक्टोबरचा हा बंद कोणालाही अडचणीत आणण्यासाठी नसून, व्यापाऱ्यांवर पडणारा अवाजवी आर्थिक भार रोखण्यासाठी काढलेला शांततापूर्ण मार्ग असल्याचे महाराष्ट्र चेंबर ऑफ कॉमर्सने स्पष्ट केले आहे.
ही बातमी वाचा:
महत्त्वाच्या बातम्या





















