Gold Silver Price Today : चांदी सत्तर हजारांच्या आत, दरात 1000 रुपयांची घसरण, सोने 'जैसे थे'

चांदीच्या दरात सलग दुसऱ्या दिवशी मोठी घसरण झाल्याचं पहायला मिळतंय. दोन दिवसांत चांदीच्या दरात 1600 रुपयांची घसरण झाली असून चांदी आता सत्तर हजारांच्या आत आली आहे.

gold-silver

मुंबई : सातत्याने बदल होत असलेल्या चांदीच्या भावात आज सलग दुसऱ्यांदा मोठी घट झाली आहे. गुरुवारी बाजार बंद होतांना चांदीच्या भावात 1000 रुपयांची घट झाल्याचं पहायला मिळतंय. आता एक किलो चांदीसाठी 69,000 रुपये इतकी किंमत मोजावी लागणार आहे. तुलनेत सोन्याच्या भावात कोणताही बदल झाला नाही. मुंबई आणि पुण्यात 10 ग्रॅम 24 कॅरेट सोन्याचा भाव हा 47,980 रुपये इतका आहे तर 22 कॅरेट सोन्याचा भाव हा 46,980 रुपये इतका आहे. 

दोन दिवसांचा अपवाद वगळता सोन्याच्या किंमती स्थिर झाल्याचं दिसून येतंय. सोन्याच्या किंमतीत मंगळवारी 120 रुपयांची तर बुधवारी 320 रुपयांची वाढ झाली आहे. सध्या सोन्याच्या किंमती आवाक्यातील असून त्यामध्ये गुंतवणूक करण्याचा हाच योग्य काळ असल्याचं मत काही तज्ज्ञांनी व्यक्त केलंय. येत्या काळात सोन्याच्या किंमती पुन्हा वाढण्याची शक्यता आहे असा अंदाजही त्यांनी व्यक्त केला आहे. 

गेल्या वर्षी ऑगस्ट 2020 मध्ये सोन्याच्या भावाने प्रती 10 ग्रॅमसाठी 56 हजार रुपयांचा विक्रमी आकडा गाठला होता. त्यानंतर सोन्याच्या भावामध्ये आता जवळपास आठ हजार रुपयांची घसरण झाल्याची पहायला मिळतंय. कोरोनाच्या प्रादुर्भावाचा सोन्याच्या दरावर चांगलाच परिणाम झाल्याचं दिसून आलंय.

चांदीची किंमत सत्तर हजारांच्या आत
गेल्या आठवड्याचा विचार करता चांदीमध्ये मोठी चढ-उतार पहायला मिळाली आहे. 30 जून रोजी चांदीमध्ये 400 रुपयांची घट झाली होती. त्यानंतर 1 जुलैला 1100 रुपये, 3 जुलैला 700 रुपये, 5 जुलैला 1200 रुपयांनी चांदीच्या दरात वाढ झाली आहे. तीन दिवसांपूर्वी 6 जुलैला चांदीमध्ये 200 रुपयांची वाढ झाली तर बुधवारी त्यामध्ये 600 रुपयांची घट झाल्याची पहायला मिळालंय. आता पुन्हा एकदा चांदीच्या दरात 1000 रुपयांची घट झाली आहे. 

मुंबईतील सोन्याच्या भावावर आंतरराष्ट्रीय दराचा जरी फरक पडत असला तरी काही स्थानिक गोष्टीही प्रभाव टाकतात. इंडियन बुलियन ज्वेलर्स असोसिएशनकडून मुंबईतील सोन्याचा दर ठरवला जातोय. त्यामध्ये स्थानिक आयात कर आणि MCX या कमोडिटी मार्केटचा विचार केला जातो. MCX हे देशातील सर्वात मोठे कमोडिटी मार्केट असून या ठिकाणी सोन्याचा भाव ठरवला जातो. 

महत्वाच्या बातम्या :