Ind Beat Pak T20 World Cup : महाशिवरात्रीला टीम इंडियाचा विजयाचा अभिषेक; पाकिस्तानवर दणदणीत विजय

Team India Beat Pakistan T20 World Cup Point Table 2026 : महाशिवरात्रीचा मुहूर्त आणि समोर पारंपरिक प्रतिस्पर्धी पाकिस्तान... अशा हायव्होल्टेज वातावरणात टीम इंडियाने आपल्या नावाचा डंका वाजवला आहे. श्रीलंकेच्या आर. प्रेमदासा स्टेडियमवर रंगलेल्या टी-20 विश्वचषक 2026 च्या थरारात सूर्यकुमार यादवच्या यंग ब्रिगेडने पाकिस्तानचा 61 धावांनी धुव्वा उडवला. या विजयासोबतच भारताने दिमाखात सुपर-8 मध्ये धडक मारली असून पाकिस्तानच्या विश्वचषकातील आशा आता अधांतरी आहेत.

ईशान किशनचा तांडवा

प्रथम फलंदाजी करताना भारतीय फलंदाजांनी पाकिस्तानी गोलंदाजीची पिसे काढली. ईशानने 40 चेंडूत 10 चौकार आणि तीन षटकारांसह 77 धावा केल्या, तर कर्णधार सूर्यकुमार यादवने 29 चेंडूत तीन चौकारांसह 32 धावा केल्या. यामुळे भारताने निर्धारित 20 षटकांत 7 गड्यांच्या मोबदल्यात 175 धावांचा आव्हानात्मक डोंगर उभा केला.  

पाकिस्तानचा फ्लॉप शो

176 धावांच्या लक्ष्याचा पाठलाग करताना पाकिस्तानची सुरुवात अत्यंत खराब झाली. भारतीय गोलंदाजांच्या भेदक माऱ्यासमोर एकाही पाकिस्तानी फलंदाजाला तग धरता आला नाही. संपूर्ण संघ 18 षटकांत अवघ्या 114 धावांत गारद झाला. 61 धावांच्या या मोठ्या विजयाने भारताच्या नेट रनरेटमध्ये मोठी सुधारणा झाली आहे.