Ulhasnagar : "राजा उल्हासनगरचा" या गणेश मंडळावर कारवाई, विनापरवाना मिरवणूक काढल्याने गुन्हा

"राजा उल्हासनगरचा" या गणेश मंडळाला पोलिसांनी चांगलाच दणका दिला आहे. विनापरवानगी गणेश मूर्तीच्या आगमनाची मिरवणूक काढून तब्बल 6 तास वाहतुकीस अडथळा निर्माण केल्याबाबत मंजळ पदाधिकाऱ्यांवर गुन्हा दाखल करण्यात आला आहे. उल्हासनगर कॅम्प नंबर 1 येथील सोनारा हॉलजवळ शहरातील "राजा उल्हासनगरचा" या गणेश मंडळाचा गणपती बसविण्यात येतो. यंदाही 12 सप्टेंबर रोजी मंडळाच्या वतीने मूर्ती आणण्यात आली. दुपारी 4 ते रात्री 10 वाजेपर्यंत भव्य मिरवणूक काढण्यात आली. या मिरवणुकीत मंडळाच्या पदाधिकाऱ्यांसह शेकडो लोक सहभागी झाले होते. त्यामुळे वाहतूकीस अडथळा आणि सार्वजनिक रस्त्यांची वाहतूक बंद झाली होती, ड्रोनचा विनापरवाना वापर, घोषणाबाजी करणे, बेकायदेशीर जमाव, त्याचप्रमाणे ढोल ताशे वाजवून ध्वनी प्रदूषण करून सर्वोच्च न्यायालयाच्या आदेशाचे उल्लंघन करण्यात आल्याने हा गुन्हा दाखल करण्यात आल्याची माहिती उल्हासनगर पोलिसांनी दिली आहे.