Shane Warne : ऑस्ट्रेलियाचा महान लेग स्पिनर शेन वॉर्नचं हृदयविकाराच्या तीव्र झटक्यानं निधन

ऑस्ट्रेलियाचा महान लेग स्पिनर शेन वॉर्नचं वयाच्या ५२व्या वर्षी हृदयविकाराच्या तीव्र झटक्यानं निधन झालं आहे. महान यष्टिरक्षक-फलंदाज रॉडनी मार्श यांच्या निधनाच्या बातमीतून सावरण्याच्या आत वॉर्नच्या निधनाची आलेली बातमी ऑस्ट्रेलियासाठी आणखी मोठा धक्का देणारी ठरली आहे. वॉर्नचं वास्तव्य सध्या थायलंडमधल्या कोह समुई बेटावरच्या त्याच्या व्हिलामध्ये होतं. त्या व्हिलामधल्या कर्मचाऱ्यांना तो अजिबात प्रतिसाद देत नसल्याच्या अवस्थेत आढळून आला. त्यानंतर वॉर्नवर वैद्यकीय उपचार करण्याचा प्रयत्नही करण्यात आला. पण त्याआधीच त्याचं निधन झाल्याचं आढळून आलं. वॉर्ननं १९९१ ते २००७ या १५ वर्षांच्या कारकीर्दीत कसोटी क्रिकेटमध्ये ७०८ आणि वन डे क्रिकेटमध्ये २९३ विकेट्स घेतल्या आहेत. आंतरराष्ट्रीय क्रिकेटमध्ये एक हजारपेक्षा अधिक विकेट्स घेण्याचा मान मुथय्या मुरलीधरन आणि शेन वॉर्न या दोनच गोलंदाजांकडे आहे. विस्डेनच्या शतकातल्या पाच क्रिकेटवीरांच्या यादीतही त्याचा समावेश करण्यात आला होता.