Thane Diva Mega Block : ठाणे-दिवा दरम्यान 72 तासांचा मेगाब्लॉक ABP Majha

उपनगरीय लोकलनं प्रवास करत असलेल्या मुंबईकरांसाठी अतिशय महत्त्वाची बातमी. तुम्ही जर शनिवार, रविवार किंवा सोमवारी मध्य रेल्वे मार्गावरच्या लोकलनं प्रवास करणार असाल तर तूर्तास तुमचा बेत बदला. याचं कारण ५, ६ आणि ७ फेब्रुवारी या तीन दिवसांत ठाणे ते दिवा स्थानकांदरम्यान ७२ तासांचा जम्बो मेगा ब्लॉक असणार आहे. त्यामुळं ठाणे-दिवा स्थानकांदरम्यान जवळपास ३५० लोकल धावणार नाहीत. या तीन दिवसांत मध्य रेल्वेच्या जलद लोकल ट्रेन्स स्लो ट्रॅकवर वळवण्यात आल्या आहेत. पण काही गाड्या रद्द झाल्यामुळं प्रवाशांचा खोळंबा होण्याची शक्यता आहे. त्याशिवाय शंभरपेक्षा अधिक लांब पल्ल्याच्या गाड्या रद्द करण्यात आल्या आहेत. महत्त्वाचं म्हणजे कोकणात जाणाऱ्या गाड्या सलग तीन दिवसांसाठी रद्द करण्यात आल्या आहेत. ठाणे ते दिवादरम्यान पाचव्या आणि सहाव्या मार्गिकेवर शेवटचा जम्बो मेगा ब्लॉक असणार आहे. त्यानंतर ही मार्गिका सुरु होणार आहे. पण येत्या शनिवारी आणि सोमवारी लोकलनं प्रवास करणाऱ्या मुंबईकरांचे हाल होण्याची शक्यता आहे.