Manoj Jarange Mumbai Morcha : मी एकटा मुंबईत येतो, देवेंद्र फडणवीस परवानगी देणार का?
Manoj Jarange Mumbai Morcha : मी एकटा मुंबईत येतो, देवेंद्र फडणवीस परवानगी देणार का?
मुंबईतील मराठा आंदोलनासाठी आझाद मैदान पोलिसांकडून परवानगी नाकारण्यात आल्यानंतर मनोज जरांगे पाटील यांनी आपल्या रणनीतीमध्ये बदल केला आहे. मनोज जरांगे पाटील यांनी आता संपूर्ण मराठा आंदोलकांची फौज सोबत घेऊन न जाता एकट्यानेच मुंबईला जाण्याची घोषणा केली आहे. गणेशोत्सवाच्या काळात लाखो मराठा आंदोलक मुंबईत आल्यास कायदा-सुव्यवस्थेचा प्रश्न निर्माण होऊ शकतो, असे कारण पोलिसांनी दिले होते. त्यामुळे मनोज जरांगे पाटील यांनी मी एकटाच मुंबईला येतो, अशी घोषणा करुन टाकली आहे. त्यानुसार मनोज जरांगे त्यांच्या चार ते पाच सहकाऱ्यांसह उद्या मुंबईला रवाना होतील. आता पोलीस आणि देवेंद्र फडणवीस मला मुंबईत येण्यापासून रोखू शकत नाहीत. आता मला कोणी अडवले तर लाखो मराठे बिनापरवानगी मुंबईत घुसतील, असा इशारा मनोज जरांगे पाटील यांनी दिला. ते सोमवारी अंतरवाली सराटी येथे प्रसारमाध्यमांशी बोलत होते. पोलिसांनी परवानगी नाकारल्यामुळे आता आपल्याल रणनीतीमध्ये बदल करावे लागतील. फडणवीसांच्या तोडीस तोड डाव टाकायचा आपण. मुंबई पोलिसांनी आंदोलनाला परवानगी नाकारले ना, मग 15 तारखेला मी एकटा मुंबईला निघतो. आता मला एकट्याला देवेंद्र फडणवीस परवानगी देणार की नाही? मराठे मुंबईत गेल्यावर अडचणी निर्माण होणार, मग मी एकटा गेल्यावर परवानगी देणार नाही का?, असा सवाल जरांगे पाटील यांनी विचारला.





















