Pakistan Lioness on Road : पाकिस्तानमध्ये भररस्त्यात सिंहीणीचा मुक्तसंचार, व्हिडीओ तुफान व्हायरल

पाळीव प्राणी म्हटलं की आपल्या डोळ्यासमोर येतात ते म्हणजे कुत्रा, मांजर, गाय, बैल.... आणि त्यांचा आपल्या अवतीभोवती बेमालुम वावर सुद्धा असतो. पण पाकिस्तानच्या कराची शहरात एक अजब प्रकार घडलाय. अगदी जुमांजी सिनेमातल्या सारखा....भरदिवसा, भररस्त्यात एक सिंहीण फेरफटका मारतानाचा व्हीडिओ समोर आलाय. आपल्या अरुंद गल्ल्यांमध्ये पाळीव प्राण्यांचा जसा मुक्त संचार असतो अगदी तितक्याच बिनधास्तपणे ही सिंहीण रस्त्याने फिरत होती. रस्त्यावर सिंहाला फिरताना पाहून लोकांची मात्र पार भांबेरी उडाली.  पण सुदैवाने यावेळी कोणालाही तिने इजा केली नाही. ही सिंहीण पाळीव असल्याचं लक्षात आल्यावर पोलिस आणि वाईल्ड लाईफ प्रोटेक्शन टीमने सिंहीणीला जेरबंद केलंय. तसच तिच्या मालकालाही पोलिसांनी ताब्यात घेतलंय. एका व्यक्तीने आपल्या फार्म हाऊसवर या सिंहीणीला ठेवलं होतं पण तब्येत बिघडल्यामुळे डॉक्टरकडे नेत असताना सिंहीणीने गाडीतून उडी मारल्यामुळे हा सगळा प्रकार घडलाय.