MP Bus Accident | प्रवाशांनी भरलेली बस कालव्यात कोसळली, अपघातात 30 प्रवाशांनी जीव गमावला

मध्य प्रदेशमध्ये सिधी जिल्ह्यात रिवा-सिधी बॉर्डरच्या जवळ एक अपघात झाला आहे. 54 प्रवाशांनी भरलेली बस कालव्यात कोसळल्याने 30 लोकांचा मृत्यू झाल्याची माहिती समोर आली आहे. या संदर्भात एएनआयनं देखील वृत्त दिलं आहे. या अपघातात काही जणांना सुखरुप वाचवण्यात यश आलं असून अद्याप अनेक जण बेपत्ता आहेत. चालकाचं बसवरील नियंत्रण सुटल्याने हा अपघात झाल्याची प्राथमिक माहिती आहे. या घटनेनंतर मध्यप्रदेशचे मुख्यमंत्री शिवराज सिंह चौहान यांनी दु:ख व्यक्त केलं असून अधिकाऱ्यांना बचाव कार्य आणि मदत करण्याबाबत आदेश दिले आहेत.