Chandrapur Honest Thief चोरी केली पोटासाठी, पण पैशाला हात लावला नाही, चंद्रपुरातील हॉटेलमधील प्रकार!

चंद्रपूर-नागपूर महामार्गावर हॉटेल सचिन आहे. आजूबाजूला फारशी लोकवस्ती नसलेले पण अगदी हायवेवर असलेल्या या हॉटेलमध्ये ही घटना घडली आहे. चंद्रपुरात 10 तारखेपासून चार दिवसांचा जनता कर्फ्यू लागू करण्यात आला होता. त्यावेळी दुकाने, हॉटेल्स, काम-धंदे सारं काही बंद होते. 10 सप्टेंबरच्या रात्री हा युवक हॉटेल सचिनमध्ये घुसला. भूक आणि तहानेने व्याकूळ झालेल्या या चोराने आधी फ्रीजमधून पाण्याची बॉटल काढली आणि मनसोक्त पाणी प्यायला. ती बॉटल परत फ्रीजमध्ये ठेवली. त्यानंतर त्याने हाती जे लागेल ते खाल्ले, काही खिशात भरले. कदाचित तो घरच्या लोकांसाठी नेत असावा. नंतर कॅश काऊंटरचे कप्पे उघडून बघितले. त्यात त्याला मोठी रक्कम दिसली. मात्र ही रक्कम त्याने जशीच्यातशी ठेवली आणि निघून गेला.