Special Report on Marathwada Disel Crisis : मराठवाड्यात आधी पाणीटंचाई, आता इंधन तुटवडा

ऐन उन्हाळ्यात दरवर्षी मराठवाड्यातील नागरिकांना पाणीटंचाईचा सामना करावा लागतो. मात्र या पाणीटंचाईसोबतच यंदा मात्र इथल्या अनेक जिल्ह्यात इंधनटंचाईची समस्या जाणवतेय. अनेक शहरांमध्ये पेट्रोल पंपांवर नो स्टॉकचे बोर्ड झळकलेयत... महामार्गावरच्या पेट्रोल पंपांवर वाहनधारकांची मोठी गर्दी दिसतेय.... त्यामुळे सर्वांचीच गैरसोय होतेय... पाहूयात याच सगळ्याचा घेतलेला हा आढावा....

राज्यातील अनेक भागांप्रमाणे लातूर जिल्ह्यातही सध्या डिझेलचा तुटवडा तीव्र जाणवत आहे. जिल्ह्यातील अनेक ठिकाणी डिझेल उपलब्ध नसल्याने वाहनचालक आणि मालवाहतूकदारांना मोठ्या अडचणींचा सामना करावा लागत आहे.
     
या पार्श्वभूमीवर डिझेल काळा बाजाराच्या घटनांमध्येही वाढ झाली आहे. महाराष्ट्र–कर्नाटक सीमेवर मोठ्या प्रमाणात होणाऱ्या वाहतुकीदरम्यान ट्रक मधून डिझेल काढून त्याची विक्री केली जात असल्याचे प्रकार समोर येत आहेत.
   
निलंगा तालुक्यात अशाच प्रकारे ट्रकमधून डिझेल काढून विक्री केली जात असल्याची घटना मोबाईल कॅमेऱ्यात कैद झाली आहे. डिझेलच्या टंचाईमुळे वाहनचालकांवर अशा मार्गांचा अवलंब करण्याची वेळ आल्याचे चित्र आहे.