1st T20 Ind Vs NZ : यजमान किवींचा धुव्वा उडवण्यासाठी भारत सज्ज

टी20 मालिकेसाठी कर्णधार विराट कोहलीला विश्रांती देण्यात आली असून रोहित शर्माच्या नेतृत्वात टीम इंडिया यजमान किवींचा मुकाबला करणार आहे.

मुंबई : भारत आणि न्यूझीलंड संघांमधल्या ट्वेन्टी ट्वेन्टी सामन्यांच्या मालिकेला आजपासून सुरुवात होत आहे. उभय संघातल्या तीन टी20 सामन्यांच्या मालिकेतला पहिला सामना वेलिंग्टनमध्ये खेळवण्यात येणार आहे. भारतीय वेळेनुसार दुपारी बारा वाजता हा सामना सुरु होईल. टी20 मालिकेसाठी कर्णधार विराट कोहलीला विश्रांती देण्यात आली असून रोहित शर्माच्या नेतृत्वात टीम इंडिया यजमान किवींचा मुकाबला करणार आहे. न्यूझीलंडविरुद्धच्या वन डे मालिकेत टीम इंडियाने ऐतिहासिक विजय साजरा केला होता. भारताने ही मालिका 4-1 ने खिशात घातली होती. परदेशी भूमीत विजयाचे नवे मापदंड रचण्याचा प्रयत्न टीम इंडिया गेल्या तीन महिन्यांपासून करत आहे. ऑस्ट्रेलिया दौऱ्यात कोहलीच्या नेतृत्वामध्ये भारतीय संघाने कसोटी मालिकेत यजमान संघावर 2-1 ने ऐतिहासिक विजय मिळवला होता. भारताने तब्बल 71 वर्षांनंतर ऑस्ट्रेलियात कसोटी मालिका जिंकली. त्यानंतर झालेल्या दोन सामन्यांची टी20 मालिका 1-1 अशी बरोबरीत राखली होती. भारतीय क्रिकेटच्या इतिहासात पहिल्यांदाच भारतीय संघाला ऑस्ट्रेलियात इतकं मोठं यश मिळालं.

न्यूझीलंडविरुद्धच्या विजयाने टीम इंडियाच्या ‘या’ खेळाडूंना फायदा

ऑस्ट्रेलियातील ऐतिहासिक विजय आणि न्यूझीलंडविरुद्ध वनडे मालिका जिंकल्यानंतर आता ट्वेन्टी ट्वेन्टीच्या मैदानातही वर्चस्व गाजवण्याचा टीम इंडियाच्या शिलेदारांचा निर्धार राहील. 'आम्हीसुद्धा माणसं आहोत, आमच्या शरीरालाही आरामाची गरज आहे. आम्ही विजयाची मालिका कायम राखण्याचा प्रयत्न करु' असं सलामीवीर शिखर धवन न्यूझीलंडविरुद्धच्या पहिल्या टी20 सामन्याच्या पूर्वसंध्येला म्हणाला होता. युवा विकेटकीपर आणि फलंदाज रिषभ पंत वनडे मालिकाचा भाग नव्हता, मात्र टी20 मालिकेत आपली कमाल दाखवून विश्वचषकासाठी खेळणाऱ्या संघात स्थान मिळवण्यासाठी तो प्रयत्नशील असेल.

धोनीपासून सावधान, आयसीसीचा कानमंत्र

टीम इंडियाचा दिग्गज क्रिकेटपटू महेंद्रसिंग धोनी मोठ्या कालावधीनंतर टी 20 संघात पुनरागमन करत आहे. धोनी गेल्या वर्षी जुलै महिन्यात टी20 सामना खेळला होता. दुसरीकडे, वनडे मालिकेतील पराभवाचा वचपा काढण्याचा यजमान न्यूझीलंड संघाचा प्रयत्न असेल. दहा वर्षांपूर्वी म्हणजेच 2008-09 मध्ये झालेल्या टी20 मालिकेत न्यूझीलंडने 2-0 ने भारताचा पराभव केला होता.

संबंधित बातम्या :

INDvsNZ : टीम इंडियाचा न्यूझीलंडवर दणदणीत विजय, मालिका 4-1 ने जिंकली

INDvsNZ : पुढे नको भाऊ…घेऊन टाक!!! धोनीचा मराठी तडका