विराट कोहलीची विशेष क्लबमध्ये एन्ट्री; असं करणारा सहावा भारतीय क्रिकेटर

IND Vs NZ WTC Final 2021: वर्ल्ड टेस्ट चॅम्पियनशिप फायनलच्या दुसर्‍या दिवशी विराट कोहली 44 धावांच्या खेळीसह नाबाद राहिला. कोहलीने आपल्या छोट्या खेळीत एक रेकॉर्ड आपल्या नावावर केला आहे.

संग्रहित छायाचित्र

IND Vs NZ WTC Final 2021: आयसीसी वर्ल्ड टेस्ट चॅम्पियनशिपचा अंतिम सामना इंग्लंडच्या साऊथॅम्प्टन येथे भारत आणि न्यूझीलंड यांच्यात खेळला जात आहे. सामन्याच्या दुसर्‍या दिवशी टीम इंडियाचा कर्णधार विराट कोहली 44 धावांवर नाबाद राहिला. या छोट्या खेळीदरम्यान विराट कोहलीने भारताला कठीण परिस्थितीतून बाहेर काढतानाच एक खास विक्रम आपल्या नावावर केला आहे.

कसोटी क्रिकेटमध्ये 7500 पेक्षा जास्त धावा करणाऱ्या खेळाडूंच्या पंक्तीत विराट कोहली बसला आहे. 92 कसोटी आणि 154 डाव खेळत विराट कोहलीने हे स्थान मिळवलं आहे. विराट कोहलीच्या अगोदर केवळ 6 भारतीय खेळाडू कसोटी क्रिकेटमध्ये 7500 पेक्षा जास्त धावा करू शकले आहेत. कसोटी क्रिकेटमध्ये विराट कोहलीच्या नावावर 27 शतके आणि 25 अर्धशतके आहेत.

धोनीना टाकले मागे
अंतिम सामन्यात मैदानात उतरताच विराट कोहलीने आणखी एक रेकॉर्ड आपल्या नावावर केले आहे. विराट कोहली हा भारतासाठी सर्वाधिक कसोटी सामन्यांसाठी संघाचा कर्णधार ठरला आहे. कर्णधार म्हणून विराट कोहलीची ही 61 वी कसोटी आहे. यापूर्वी बहुतेक कसोटींमध्ये भारताचे नेतृत्व करण्याचा विक्रम धोनीच्या नावावर होता. धोनीने 60 कसोटी सामन्यात भारताचे नेतृत्व केले होते आणि त्यापैकी 27 सामन्यांमध्ये संघाला विजय मिळवून दिला होता.

विराट कोहली हा कसोटी क्रिकेटमधील सर्वात यशस्वी कर्णधार आहे. 2014 मध्ये ऑस्ट्रेलिया दौर्‍यावर विराट कोहली टीम इंडियाचा कर्णधार झाला होता. विराट कोहलीने आतापर्यंत 36 कसोटी सामन्यात भारताला विजय मिळवून दिला आहे.

कसोटी क्रमवारीत विराट कोहली सध्या चौथ्या स्थानी आहे. विराट कोहलीने आयसीसी वर्ल्ड टेस्ट चॅम्पियनशिपच्या अंतिम सामन्यात शतक झळकावल्यास त्याला आयसीसी कसोटी क्रमवारीत आपले स्थान मजबूत करण्याची संधी आहे.