रॉस टेलर-लॅथमची अभेद्य भागीदारी, न्यूझीलंडचा 6 विकेटने विजय

टॉम लॅथम आणि रॉस टेलरने चौथ्या विकेटसाठी रचलेल्या 200 धावांच्या भागीदारीने न्यूझीलंडच्या विजयात निर्णायक भूमिका बजावली.

मुंबई : न्यूझीलंडने मुंबईच्या पहिल्या वन डेत भारताचा 6 विकेट्सनी धुव्वा उडवून, तीन सामन्यांच्या मालिकेत 1-0 अशी आघाडी घेतली. या पराभवामुळे वन डे सामन्यांच्या क्रमवारीत पुन्हा नंबर वन होण्याची टीम इंडियाची संधी हुकली. कर्णधार विराट कोहलीने झळकावलेल्या शतकाला यशाचा टिळाही लागू शकला नाही. टॉम लॅथम आणि रॉस टेलरने चौथ्या विकेटसाठी रचलेल्या 200 धावांच्या भागीदारीने न्यूझीलंडच्या विजयात निर्णायक भूमिका बजावली. या सामन्यात न्यूझीलंडचे पहिले तीन फलंदाज स्वस्तात माघारी परतले होते. पण लॅथमने नाबाद 103 धावांची खेळी उभारून न्यूझीलंडच्या विजयात प्रमुख भूमिका बजावली. रॉस टेलरचं शतक पाच धावांनी हुकलं. त्याने 95 धावांची खेळी करून लॅथमला साथ दिली. विराट वन डेत सर्वाधिक शतकवीरांच्या यादीत दुसऱ्या स्थानावर टीम इंडियाचा कर्णधार विराट कोहलीने न्यूझीलंडविरुद्धच्या पहिल्या वन डेत शतक झळकावून वन डे सामन्यांचं द्विशतकही साजरं केलं. विराट हा कारकीर्दीतल्या दोनशेव्या वन डेत शतक ठोकणारा दुसरा फलंदाज ठरला. याआधी दक्षिण आफ्रिकेच्या एबी डिव्हलियर्सने हा पराक्रम गाजवला होता. विराटने डिव्हिलियर्सच्या पावलावर पाऊल टाकून कारकीर्दीतलं एकतिसावं शतक झळकावलं. त्यामुळे वन डे सामन्यांच्या इतिहासात सर्वाधिक शतकं फटकावणारा तो दुसरा फलंदाज ठरला. विराटनं रिकी पॉन्टिंगचा तीस शतकांचा विक्रम मोडीत काढला. सर्वाधिक वन डे शतकांच्या शर्यतीत सचिन तेंडुलकर आणि विराट हे दोन भारतीय फलंदाज पहिल्या दोन स्थानावर आहेत. सचिन तेंडुलकरने वन डे कारकीर्दीत 49 शतकं झळकावली आहेत. सचिनच्या या विक्रमापासून विराट आता 18 शतकं दूर आहे. विशेष म्हणजे विराट वन डेच्या आतापर्यंत 192 इनिंग खेळला आहे. यामध्येच त्याने 31 शतकं पूर्ण केली. सचिनचे पहिल्या 186 इनिंगमध्ये 16, तर पाँटिंगचे पहिल्या 186 इनिंगमध्ये 15 शतकं होते. म्हणजेच विराटने या दिग्गजांच्या दुप्पट वेगाने शतकं पूर्ण केली आहेत.

संबंधित बातमी : 200 वन डे, 31 शतकं, विराटने पॉन्टिंगला मागे टाकलं