GT vs MI, IPL 2023 Qualifier 2 : इंडियन प्रीमियर लीगचा यंदाचा सोळावा हंगाम सध्या अंतिम टप्प्यात आहे. आज आयपीएल 2023 मधील दुसरा क्वालिफायर सामना मुंबई इंडियन्स (Mumbai Indians) आणि गुजरात टायटन्स (Gujrat Titans) यांच्यात खेळवला जाणार आहे. 26 मे रोजी, अहमदाबादच्या नरेंद्र मोदी स्टेडिअमवर (Narendra Modi Stadium) हा सामना रंगणार आहे. हा सामना जिंकणाऱ्या संघाला आयपीएल 2023 च्या अंतिम फेरीत प्रवेश मिळेल. आयपीएल फायनल सामन्याच्या तिकीटासाठी गुजरात आणि मुंबई दोन्ही संघ सज्ज झाले आहेत.
मुंबई आणि गुजरात संघात लढत
पाच वेळा विजेता मुंबई इंडियन्स (Mumbai Indians) संघ आणि गतविजेता गुजरात टायटन्स संघ (Gujrat Titans) अंतिम फेरीपासून एक पाऊल दूर आहे. कर्णधार रोहित शर्माच्या नेतृत्वात मुंबई इंडियन्सला हार्दिक पांड्याच्या गुजरात टायटन्सचं आव्हान असेल. यंदाच्या आयपीएलमध्ये सुरुवातीपासूनच गुजरात संघाचा चांगला फॉर्म पाहायला मिळाला आहे. मुंबई इंडियन्स संघाची यंदाच्या हंगामातील सुरुवात काही खास राहिली नाही, मात्र संघ प्लेऑफमध्ये पोहोचण्यात यशस्वी ठरला.
मुंबई इंडियन्स संघाची प्लेऑफमधील आकडेवारी वरचढ
आयपीएलच्या यंदाच्या हंगामात मुंबई इंडियन्स आणि गुजरात टायटन्स दोन्ही संघ दोन वेळा आमनेसामने आले होते. यामध्ये दोन्ही संघानी प्रत्येकी एक सामना आपल्या नावे केला. गुजरात टायटन्सने मुंबई इंडियन्सला त्यांच्या घरच्या मैदानावर हरवलं. यानंतर रोहित शर्माच्या नेतृत्त्वात मुंबई संघाने हार्दिक पांड्याच्या गुजरात संघाला त्यांच्या घरच्या मैदानावर पराभूत करत बदला घेतला. आता हे दोन्ही संघ आज पुन्हा आयपीएल 2023 क्वालिफायर 2 मध्ये दोन्ही संघ या मोसमात तिसऱ्यांदा भिडतील. गुजरात संघाच्या घरच्या मैदानावर हा सामना होत असल्याने गुजरातला काहीसा फायदा आहे. पण मुंबई इंडियन्स संघाची प्लेऑफमधील आकडेवारी वरचढ आहे.
मुंबई इंडियन्स 6 वर्षांपासून प्लेऑफमध्ये अजिंक्य
मुंबई इंडियन्सचा संघ मागील सहा आयपीएलच्या प्लेऑफ सामन्यांमध्ये अजिंक्य आहे. मुंबई संघाने आयपीएल 2017 मध्ये शेवटचा प्लेऑफ सामना गमावला होता. त्यानंतरच्या आयपीएल प्लेऑफधील सर्व सामने जिंकले आहेत. आयपीएल 2017 मध्ये मुंबई संघाला क्वालिफायर 1 मध्ये रायझिंग पुणे सुपर जायंट्सकडून पराभव पत्करावा लागला होता. पण तरीही मुंबई संघाने आयपीएल 2017 चं विजेतेपद जिंकलं. मुंबई संघ 2017 नंतर, 2019, 2020 आणि आता 2023 मध्ये प्लेऑफमध्ये पोहोचला आहे. कर्णधार रोहित शर्माच्या नेतृत्वाखाली मुंबई इंडियन्सने 14 प्लेऑफ सामने खेळले आहेत. त्यापैकी 11 प्लेऑफ सामन्यांमध्ये त्यांना विजय मिळाला. मुंबई इंडियन्स संघ सहा वेळा अंतिम फेरीत पोहोचला असून पाच वेळा चॅम्पियन ठरला आहे. प्लेऑफमध्ये पोहोचल्यानंतर मुंबई संघाची कामगिरी दमदार आहे. त्यामुळे ही आकडेवारी गुजरात टायटन्सचं टेन्शन वाढवू शकते.
अंतिम फेरीच्या तिकीटासाठी रणसंग्राम
आयपीएल 2023 (IPL 2023) च्या एलिमिनेटर सामन्यामध्ये मुंबई इंडियन्सने लखनौ सुपर जायंट्सचा 81 धावांनी पराभव करत सलग सातवा विजय मिळवला. त्यानंतर मुंबई इंडियन्स दुसऱ्या क्वालिफायर सामन्यात पोहोचला. आता आयपीएल 2023 चा दुसरा क्वालिफायर सामना आज, 26 मे रोजी अहमदाबादच्या नरेंद्र मोदी स्टेडिअमवर संध्याकाळी 7.30 वाजता हा सामना रंगणार आहे.