IPL ने बना दी जोडी... सामन्यानंतर CSK च्या स्टार गोलंदाजानं गर्लफ्रेंडला मैदानातच केलं प्रपोज
काल आयपीएलच्या मैदानात चेन्नई विरुद्ध पंजाबचा सामना खेळवण्यात आला होता. या सामन्यानंतर दीपक चाहरनं आपली गर्लफ्रेंड जया भारद्वाजला प्रपोज केलं. या खास क्षणाचे फोटो सध्या सोशल मीडियावर व्हायरल होत आहेत.
Deepak Chahar : आयपीएल 2021 मध्ये गुरुवारी खेळवण्यात आलेल्या सामन्यात पंजाब किंग्सनं चेन्नई सुपर किंग्सचा पराभव केला. पण हा सामना संपल्यानंतर मैदानात एक खास क्षण पाहण्याची संधी सर्वांना मिळाली. चेन्नई सुपर किंग्सचा स्टार गोलंदाज दीपक चाहरनं स्टेडिअममधील स्टँड्समध्ये आपली गर्लफ्रेंड जया भारद्वाजला सर्वांसमोर प्रपोज केलं. हा क्षण पाहून उपस्थित प्रत्येकजण आश्चर्यचकीत झाले होते. सध्या हे फोटो सोशल मीडियावर मोठ्या प्रमाणावर व्हायरल होत आहेत.
सामना संपताच दीपक चाहर स्टँड्समध्ये गेला आणि आपल्या गर्लफ्रेंडला प्रपोज केला. दीपक चाहरनं गुडघ्यावर बसून आपल्या गर्लफ्रेंडला प्रपोज केलं. यावेळी, आजूबाजूला उभ्या असणाऱ्या लोकांनी टाळ्यांच्या कडकडाटात दोघांनाही शुभेच्छा दिल्या. जेव्हा दीपकला जयानं होकार दिला, त्यावेळी दोघांनीही एकमेकांना कडकडून मिठी मारली.
दीपक चाहरनं हा खास क्षण इंन्स्टाग्रामवरही शेअर केला आहे. दीपकनं दोन फोटो शेअर करत कॅप्शन दिलं आहे की, "फोटोच सर्वकाही सांगतायत, तुम्हा सर्वांचा आशीर्वाद हवाय." दरम्यान, जया भारद्वाज आणि दीपक चाहर बऱ्याच काळापासून रिलेशनशिपमध्ये आहेत. दीपक चाहरला चेन्नई सुपर किंग्स, आयपीएल, इतर खेळाडूंसह इतर दिग्गजांनीही शुभेच्छा दिल्या आहेत.
दरम्यान, दीपक चाहर चेन्नई सुपर किंग्स संघाचा स्टार गोलंदाज आहे. गुरुवारी खेळवण्यात आलेल्या पंजाब विरुद्धच्या सामन्यात दीपक चाहर फारशी उत्तम खेळी करु शकला नाही. दीपकनं 4 ओव्हर्समध्ये 48 धावा दिल्या, पण एकही विकेट घेऊ शकला नाही. अशातच आयपीएलच्या दुसऱ्या टप्प्यात चेन्नई सुपर किंग्सनं धडाकेबाज खेळी करत, प्ले ऑफचं तिकीट पक्कं केलं आहे.
महत्त्वाच्या इतर बातम्या :
महत्त्वाच्या बातम्या
