IPL 2020 RR vs CSK: अशारितीने जोफ्रा आर्चरने केवळ दोन चेंडूत ठोकल्या 27 धावा

पहिल्या दोन चेंडूंवर षटकार, यानंतर लागोपाठ दोन नो-बॉलवर षटकार, एक वाईड आणि अखेरच्या 3 चेंडूंवर एकेरी धाव अशा पद्धतीने एन्गिडीने शेवटच्या ओव्हरमध्ये 30 धावा दिल्या.

IPL 2020 RRvsCSK | आयपीएल 2020 चा चौथा सामना राजस्थान रॉयल्स आणि चेन्नई सुपर किंग्ज यांच्यात शारजाहमध्ये खेळला जात आहे. या सामन्यात स्टीव्ह स्मिथ आणि संजू सॅमसनच्या अर्धशतकांमुळे राजस्थानने 20 षटकांत 216 धावा केल्या आहेत. अखेरच्या षटकात राजस्थानने 30 धावा केल्यात.

जोफ्रा आर्चरच्या दोन चेंडूत 27 धावा 

राजस्थानची धावसंख्या 19 षटकात 7 गडी गमावून 186 होती. यानंतर चेन्नईचा कर्णधार एमएस धोनीने शेवटच्या षटकात चेंडू लुन्गि एन्गिडीकडे सोपवला. एन्गिडीच्या पहिल्याच चेंडूवर आर्चरने जोरदार षटकार ठोकला. यानंतर पुढच्या चेंडूही आर्चर सीमेपलिकडे टोलवला. त्यानंतर एन्गिडीने पुढचा चेंडू नो बॉल टाकला. आर्चरनेही त्या चेंडूवरही षटकार ठोकला. अशा प्रकारे त्या चेंडूवर सात धावा निघाल्या. यानंतर एन्गिडीने पुढचा चेंडूही नो बॉलही टाकला, त्यावर आर्चरने पुन्हा षटकार मारला. अशा प्रकारे या चेंडूवर सात धावा निघाल्या. यानंतर एन्गिडीने वाइड बॉल टाकला. अशाप्रकारे, आर्चरने केवळ दोन चेंडूंमध्ये 27 धावा केल्या. तर पहिल्या दोन चेंडूंवर षटकार, यानंतर लागोपाठ दोन नो-बॉलवर षटकार, एक वाईड आणि अखेरच्या 3 चेंडूंवर एकेरी धाव अशा पद्धतीने एन्गिडीने शेवटच्या ओव्हरमध्ये 30 धावा दिल्या.

आर्चरसोबत टॉम कुर्रन 10 धावांवर नाबाद राहिला. त्याआधी संजू सॅमसनने 74 आणि स्टीव्ह स्मिथने 69 धावांची खेळी केली. अशाप्रकारे राजस्थान रॉयल्सने चेन्नई सपर किंग्जला 217 धावांचे लक्ष्य ठेवलं.

त्याआधी संजू सॅमसनने अवघ्या 19 चेंडूत अर्धशतक ठोकलं. आयपीएल 2020 मधील हे सर्वात वेगवान अर्धशतक आहे. सॅमसनने 32 चेंडूत एक चौकर 9 षटकारांसह 74 धावा केल्या. यासह सॅमसन आयपीएलमधील राजस्थान रॉयल्सकडून सर्वात जलद अर्धशतक ठोकणारा दुसरा फलंदाज ठरला आहे. याआधी राजस्थानकडून 2018 मध्ये जॉस बटलरने 18 चेंडूत अर्धशतक ठोकलं होतं.

तसेच चेन्नई सुपर किंग्जविरुद्ध सर्वात जलद अर्धशतक झळकावण्याच्या विक्रमाशीही त्याने बरोबरी केली. याआधी केएल राहुलने 2019 मध्ये चेन्नईविरुद्ध 19 चेंडूत अर्धशतक ठोकलं होतं.