मितालीच्या शतकाच्या जोरावर न्यूझीलंडचा 186 धावांनी धुव्वा

लंडन : मिताली राजच्या भारतीय संघानं न्यूझीलंडचा 186 धावांनी धुव्वा उडवून महिला विश्वचषकाच्या उपांत्य फेरीत धडक मारली. या सामन्यात कर्णधार मिताली राजच्या खणखणीत शतकाच्या जोरावर, भारतीय महिलांनी न्यूझीलंडला विजयासाठी 266 धावांचं आव्हान दिलं होतं. राजेश्वरी गायकवाडनं 15 धावांत पाच विकेट्स काढून न्यूझीलंडचा अख्खा डाव 79 धावांत गुंडाळला. या सामन्यात मिताली राजनं वैयक्तिक शतक झळकावलंच, पण हरमनप्रीत कौर आणि वेदा कृष्णमूर्तीच्या साथीनं शतकी भागीदाऱ्याही रचल्या. त्यामुळेच भारतीय महिलांना 50 षटकांत सात बाद 265 धावांची मजल मारता आली. मितालीनं 123 चेंडूंत अकरा चौकारांसह 109 धावांची खेळी उभारली. हरमनप्रीत कौरनं सात चौकारांसह 60 धावा, तर वेदा कृष्णमूर्तीनं सात चौकार आणि दोन षटकारांसह 70 धावांची खेळी केली.

मिताली राज महिला वनडेमध्ये सर्वाधिक धावा करणारी फलंदाज

मिताली नुकतीच आंतरराष्ट्रीय महिला वनडे क्रिकेटमध्ये सर्वाधिक धावा करणारी फलंदाज ठरली आहे. मितालीने इंग्लंडची माजी क्रीडापटू शार्लोट एडवर्ड्सचा विक्रम मोडित काढला आहे. एडवर्ड्सने 191 वनडे सामन्यांमध्ये 5 हजार 992 धावा ठोकल्या होत्या. ही धावसंख्या गाठण्यासाठी एडवर्ड्सला 180 डाव खेळावे लागले होते, मात्र मितालीने केवळ 164 डावातच ही मजल मारली.

मिताली राजने अर्धशतकांच्या बाबतीत विराटलाही मागे टाकलं!

मितालीचं तिच्या कारकीर्दीतलं हे सहावं शतक ठरलं आहे. तिने आतापर्यंत 48 अर्धशतकं लगावली आहेत. विशेष म्हणजे तिने शतक ठोकलं, त्या प्रत्येक वेळी भारताला विजय मिळाला आहे. मितालीने यापूर्वीच वनडे आंतरराष्ट्रीय सामन्यांमध्ये सलग सात अर्धशतकं ठोकण्याचाही विक्रम रचला आहे. 1999 मध्ये मितालीने आयर्लंड विरुद्ध पहिला वनडे सामना खेळला होता. पहिल्याच सामन्यात तिने शतकी खेळी केली होती.

बॅटिंगआधी पुस्तक का वाचत होते, मिताली म्हणते...!