T20 World Cup 2024 Ind vs SA Final: टी-20 विश्वचषक 2024 च्या (T20 World Cup 2024)स्पर्धेत आज भारत आणि दक्षिण अफ्रिका (India vs South Africa) यांच्यात बार्बाडोस येथील केन्सिंग्टन ओव्हल स्टेडियमवर अंतिम सामना खेळवला जाईल. भारतीय वेळेनूसार रात्री 8 वाजता या सामन्याला सुरु होईल. टीम इंडियाला जवळपास 11 वर्षांपासून कोणतीही आयसीसी स्पर्धा जिंकण्यात अपयश आले आहे. त्याचबरोबर दक्षिण आफ्रिकेच्या संघाला प्रथमच आयसीसी ट्रॉफी जिंकण्याची संधी आहे. या विजेतेपदाच्या लढतीपूर्वी आयसीसीने बोर्डाच्या सर्व सदस्यांना केन्सिंग्टन ओव्हल स्टेडियमवर येण्याचे निमंत्रण दिले आहे. भारत, ऑस्ट्रेलिया, इंग्लंड आणि पाकिस्तानसह अनेक देशांचे बोर्ड चेअरमन येथे उपस्थित राहणार आहेत.
एका मीडिया रिपोर्टनुसार, टी-20 विश्वचषकाच्या अंतिम सामन्यापूर्वी आयसीसी बोर्ड सदस्यांची बैठक घेऊ शकते. याचा अर्थ पाकिस्तान क्रिकेट बोर्डाचे (पीसीबी) अध्यक्ष मोहसिन रझा नक्वी आणि बीसीसीआयचे अध्यक्ष रॉजर बिन्नीही एकमेकांना भेटू शकतात. अशा परिस्थितीत पाकिस्तानमध्ये होणाऱ्या चॅम्पियन्स ट्रॉफी 2025 बाबतही चर्चा होण्याची शक्यता आहे. मोहसीन नक्वी हे पाकिस्तानच्या सध्याच्या सरकारमध्ये केंद्रीय गृहमंत्री देखील आहेत आणि ते सध्या एका बैठकीसाठी अमेरिकेत आहेत. अमेरिकेतील बैठक संपल्यानंतर मोहसीन थेट वेस्ट इंडिजला रवाना होण्याची शक्यता आहे.
चॅम्पियन्स ट्रॉफी 2025 वर चर्चा होण्याची शक्यता-
आशिया चषक 2023 पासून पीसीबी आणि बीसीसीआयमध्ये वाद सुरू आहे. 2023 आशिया कपचे आयोजन पाकिस्तानने केले होते, परंतु बीसीसीआयने आपला संघ पाकिस्तानमध्ये उतरवण्यास नकार दिला होता. अशा परिस्थितीत भारतीय संघाचे सर्व सामने श्रीलंकेत झाले. आता चॅम्पियन्स ट्रॉफी 2025 चे यजमानपदही पाकिस्तानला देण्यात आले आहे आणि आयसीसीने नुकतेच पीसीबीच्या प्रस्तावित वेळापत्रकाला हिरवा झेंडा दाखवला आहे, ज्या अंतर्गत टीम इंडिया आपले सर्व सामने पाकिस्तानमध्ये खेळणार आहे. पण बीसीसीआय 2024 च्या टी-20 विश्वचषकाच्या अंतिम सामन्यापूर्वी होणाऱ्या बोर्ड सदस्यांच्या बैठकीत हा मुद्दा उपस्थित करू शकते. ही स्पर्धा पाकिस्तानबाहेर हलवली जाऊ शकते, असे वृत्त आहे, परंतु पीसीबी कोणत्याही परिस्थितीत हे होऊ देऊ इच्छित नाही.
भारत पाकिस्तानमध्ये गेला नाही तर...
बीसीसीआयने अनेकवेळा आपली स्पष्ट भूमिका मांडली आहे. सुरक्षेच्या कारणास्तव भारतीय संघ आयसीसी चॅम्पियन्स ट्रॉफी खेळण्यासाठी पाकिस्तानात जाणार नाही, असे बीसीसीआयचे मत आहे. आयसीसी चॅम्पियन्स ट्रॉफी खेळण्यासाठी टीम इंडिया पाकिस्तानात न गेल्यास ही स्पर्धा हायब्रिड मॉडेलवर आयोजित केली जाईल. ज्या अंतर्गत भारताचे सामने संयुक्त अरब अमिराती किंवा इतर कोणत्याही ठिकाणी खेळवले जातील.
संबंधित बातम्या:
T20 World Cup 2024: टी-20 विश्वचषक विजेता संघ होणार मालामाल; पराभूत झालेल्या संघांवरही पैशांचा पाऊस!