T20 World Cup 2024: 'खेळाडू एकमेकांना साथ देत नाहीत...'; गॅरी कर्स्टन यांनी पाकिस्तानच्या संघाबाबत केला धक्कादायक खुलासा
T20 World Cup 2024: गॅरी कर्स्टन यांनी पाकिस्तानच्या संघात उभी फूट पडल्याचा खुलासा केला आहे.
T20 World Cup 2024: गॅरी कर्स्टन (Gary Kirsten) आयसीसी टी-20 विश्वचषकापूर्वी (ICC T20 World Cup 2024) पाकिस्तान क्रिकेट संघाचे (Pakistan Cricket Team) मुख्य प्रशिक्षक बनले. मात्र त्यांच्या नेतृत्वाखाली पाकिस्तानचा संघ सुपर-8 मध्येही पोहोचू शकला नाही, त्यामुळे संपूर्ण संघ आणि कोचिंग स्टाफवर प्रश्न उपस्थित केले जात आहेत. याचदरम्यान गॅरी कर्स्टन यांनी पाकिस्तानच्या संघात उभी फूट पडल्याचा खुलासा केला आहे.
गॅरी कर्स्टन यांनी खेळाडूंमधील एकतेवर प्रश्न उपस्थित केले आहेत. स्पर्धेत सहभागी होण्याआधी आर्मी प्रशिक्षण घेतलेल्या या संघाने थोडीही झुंजार वृत्ती न दाखवता सहज गुडघे टेकले. मात्र कौशल्य आणि फिटनेसच्याबाबतीत पाकिस्तानचे खेळाडू सर्वात मागे आहेत, असं गॅरी कर्स्टन यांनी सांगितले. पाकिस्तान संघ विश्वचषकात 4 पैकी फक्त 2 सामने जिंकू शकला होता. तसेच अमेरिकेकडूनही पाकिस्तानला पराभवाचा सामना करावा लागला होता.
गॅरी कर्स्टन नेमकं काय म्हणाले?
टी-20 विश्वचषकातील पाकिस्तान संघाच्या खराब कामगिरीनंतर गॅरी कर्स्टन यांनी खेळाडूंशी चर्चा केली. कर्स्टन संघात सामील झाल्यापासून त्यांना संघात एकता दिसली नाही. याबाबत कर्स्टन म्हणाले की, खेळाडू एकमेकांना साथ देत नाहीत. मी याआधी अनेक संघांसोबत काम केले आहे, परंतु याआधी खेळाडूंमध्ये एकीची कमतरता मला कधीच जाणवली नाही. कर्स्टन यांनी असे विधान केल्याचे दावे पाकिस्तानी मीडियाने केले आहेत. पाकिस्तान संघात एकता नाही, ते त्याला संघ म्हणतात, पण तो संघ नाही. ते एकमेकांना सपोर्ट करत नाहीत; सगळे वेगळे आहेत. मी त्यांच्यासोबत काम केले आहे. अनेक संघ पाहिले आहेत, पण मी अशी परिस्थिती पाहिली नाही. एवढं क्रिकेट खेळूनही या खेळाडूंना कोणता फटका कसा मारायचा हेही माहित नसल्याचे कर्स्टन म्हणाले.
पाकिस्तान सुपर 8 मधून बाहेर
पाकिस्तानला टी 20 वर्ल्ड कपमध्ये अमेरिकेकडून सुपर ओव्हरमध्ये तर भारताकडून 6 धावांनी पराभव स्वीकारला होता. यानंतरही पाकिस्तानच्या सुपर 8 च्या आशा कायम होत्या. मात्र, आयरलँड विरुद्ध अमेरिका मॅच पावसानं रद्द झाली. त्यामुळं अमेरिकेला फायदा मिळाला आणि ते सुपर 8 मध्ये गेले. तर, कॅनडा आणि आयरलँडला पराभूत करुनही पाकिस्तान क्रिकेट संघाला घरचा रस्ता धरावा लागला.
संबंधित बातम्या:
Team India : भारताला सुपर 8 मध्ये सोपा पेपर, सेमी फायनलपासून दोन पावलं दूर, फक्त विराट अन् रोहित...
महत्त्वाच्या बातम्या
