Hardik Pandya : भारतीय संघाचा स्टार अष्टपैलू खेळाडू हार्दिक पांड्या (Hardik Pandya) पुन्हा एकदा लग्नासाठी सज्ज झाला आहे. तो पुन्हा एकदा त्याची पत्नी नताशा स्टॅनकोविकसोबतच लग्न करणार आहे, पण यावेळी पद्धत वेगळी आहे. यावेळी हार्दिक आणि नताशाचा विवाह उदयपूरमध्ये होणार आहे. दोघांच्या लग्नाला कुटुंबीय आणि जवळचे मित्र उपस्थित राहणार आहेत. लग्नाआधी हार्दिक पांड्या आणि पत्नी नताशा स्टॅनकोविक आपल्या कुटुंबासह उदयपूरला पोहोचले आहेत.


हार्दिकच्या लग्नाआधी मेहंदी आणि संगीताचा कार्यक्रमही होणार आहे. यानंतर हे जोडपे आज म्हणजेच 14 फेब्रुवारीला खास  व्हॅलेंटाइन डेला पुन्हा एकदा लग्न करणार आहेत. लग्नासाठी दोघांचे कुटुंबीय उदयपूरला पोहोचले आहेत. सर्वजणांसाठी आलिशान हॉटेल बुक करण्यात आलं आहे. मात्र या लग्नाबाबत हार्दिक किंवा नताशाच्या वतीने कोणताही खुलासा अद्याप करण्यात आलेला नाही. लग्नातील काही उत्सव हिंदू परंपरेनुसार देखील केले जातील.


पुन्हा एकदा हार्दिक अडकणार लग्नबंधनात


31 मे 2020 रोजी हार्दिक आणि नताशाचे लग्न झाले, जेव्हा दोघांनी कोर्ट मॅरेज करून एकमेकांसोबत राहण्याचा निर्णय घेतला. आता हे जोडपे त्यांचे लग्न भव्य आणि रॉयल पद्धतीने करण्याचा विचार करत आहे. याआधी दोघांनीही घाईघाईत लग्न केलं होतं. पण यावेळी दोघांनी आपल्या लग्नासाठी उदयपूरमधील एक सुंदर पॅलेस निवडलं आहे. लग्नात पाहुण्यांसमोर राजस्थानी आणि गुजराती खाद्यपदार्थ सादर केले जाणार आहेत.


टीम इंडिया सध्या बॉर्डर-गावस्कर ट्रॉफी खेळण्यात व्यस्त


विशेष म्हणजे टीम इंडिया सध्या बॉर्डर-गावस्कर ट्रॉफीसारखी महत्त्वाची मालिका खेळत आहे. संघाने ट्रॉफीचा पहिला सामना जिंकत मालिकेत 1-0 ची आघाडी घेतली आहे. पण हार्दिक पांड्याचा कसोटी संघात समावेश नसून त्याने आतापर्यंत केवळ 11 कसोटी सामने खेळले आहेत. अशा परिस्थितीत हार्दिकसाठी पुन्हा लग्न करण्याची हीच योग्य वेळ आहे. यानंतर ऑस्ट्रेलिया भारत एकदिवसीय सामने होणार असून त्यात हार्दिक संघात असू शकतो.


कोण आहे हार्दिकची पत्नी नताशा?


कोरोना काळात हार्दिक पांड्या आणि नताशा स्टॅनकोविक लग्नबंधनात अडकले होते. नताशा स्टॅनकोविक बॉलिवूड अभिनेत्री आहे. नताशा ही सर्बियन मॉडल आणि अभिनेत्री आहे. प्रकाश झा यांच्या सत्याग्रह सिनेमातून नताशानं बॉलिवूड डेब्यू केला होता. बिग बॉस सिझन 8 आणि रॅपर बादशाहच्या डिजे वाले बाबू मेरा गाना चला दे, या गाण्यातून नताशा प्रकाशझोतात आली होती. डान्स रिअॅलिटी शो नच बलिएमध्येही नताशा अली गोणीसोबत सहभागी झाली होती. 2012 मध्ये अभिनयात करिअर करण्यासाठी भारतात आलेल्या नताशाने शाहरुख खानच्या झीरो सिनेमातही छोटी भूमिका साकारली होती.


हे देखील वाचा-