IPL 2019 Qualifier 2 | चेन्नईकडून दिल्लीचा 6 विकेट्सनी धुव्वा, फायनलमध्ये मुंबईशी सामना

क्वालिफायर टू सामन्यात चेन्नईच्या गोलंदाजांनी दिल्ली कॅपिटल्सला वीस षटकांत 9 बाद 147 धावांत रोखलं होतं. चेन्नईने या सामन्यात दिल्लीचा सहा विकेट्सनी धुव्वा उडवला.

चेन्नई : आयपीएलच्या इतिहासात यंदा चौथ्यांदा मुंबई इंडियन्स आणि चेन्नई सुपर किंग्स या दोन तगड्या संघांमध्येच फायनल पाहायला मिळणार आहे. धोनीच्या चेन्नई सुपर किंग्सने विशाखापट्टणममधल्या क्वालिफायर टू सामन्यावर अगदी निर्विवाद वर्चस्व गाजवलं. चेन्नईने या सामन्यात दिल्लीचा सहा विकेट्सनी धुव्वा उडवला. चेन्नईच्या गोलंदाजांनी आधी दिल्ली कॅपिटल्सला वीस षटकांत 9 बाद 147 धावांत रोखलं होतं. पण चेन्नईच्या फॅफ ड्यू प्लेसी आणि शेन वॉटसननं 81 धावांची सलामी देऊन दिल्लीच्या आव्हानातली हवाच काढून घेतली. ड्यू प्लेसी आणि वॉटसन या दोघांनीही वैयक्तिक अर्धशतकं झळकावली. ड्यू प्लेसीने 39 चेंडूंत 50, तर वॉटसनने 32 चेंडूंत 50 धावांची खेळी उभारली. त्या दोघांनी रचलेल्या पायावर चेन्नईने विजयाचा कळस उभारला. त्याआधी, या सामन्यात दिल्ली कॅपिटल्सने वीस षटकांत नऊ बाद 147 धावांची मजल मारली होती. दिल्लीचा यष्टिरक्षक-फलंदाज रिषभ पंत या सामन्यात आपल्या लौकिकाला पुन्हा जागला. पण समोरच्या एंडने तोडीची साथ न लाभल्याने त्यालाही सढळ हातांनी मोठे फटके खेळता आले नाहीत. या सामन्यात चेन्नईच्या गोलंदाजांनी प्रभावी मारा करुन दिल्लीला नऊ षटकांत तीन बाद 59 असं रोखलं होतं. त्या कठीण परिस्थितीत मैदानात उतरलेल्या रिषभ पंतने एक खिंड लावून धरली आणि दिल्लीची धावगती सातत्याने उंचावत ठेवली. त्याने 25 चेंडूंत दोन चौकार आणि एका षटकारासह 38 धावांची खेळी उभारली. महेंद्रसिंग धोनीने आंतरराष्ट्रीय क्रिकेटमधला सर्वोत्तम मॅचफिनिशर ही बिरुदावली गेली अनेक वर्ष अभिमानानं मिरवली. वाढतं वय आणि थकलेलं शरीर यामुळे आंतरराष्ट्रीय क्रिकेटमधला धोनीचा तो लौकिक आता ओसरला आहे. पण आयपीएलच्या रणांगणात चेन्नईचा 'थाला' अजूनही ट्वेन्टी ट्वेन्टीचा सुपर किंग आहे. आयपीएलच्या अंतिम फेरीमध्ये चेन्नई सुपरकिंग्जचा सामना मुंबई इंडियन्सशी होणार आहे. आयपीएलच्या इतिहासात यंदा चौथ्यांदा मुंबई इंडियन्स आणि चेन्नई सुपर किंग्स या दोन तगड्या संघांमध्येच फायनल होणार आहे. त्यामुळे कोणता संघ आयपीएलची ट्रॉफी उंचावणार, याची दोन्ही टीम्सच्या चाहत्यांना उत्सुकता लागून राहिली आहे.