मिलिंद नार्वेकर बनले 'मातोश्री'चे सेलिब्रिटी!

शिवसेनेत नार्वेकरांना याआधीच वेगळं वलय होतं. त्यात पक्षाचं अधिकृत सचिवपद दिल्यामुळे आता मंत्री, खासदार, आमदारांप्रमाणेच कार्यकर्त्यांचाही मिलिंद नार्वेकरांभोवती गराडा पडू लागला आहे.

त्या व्यक्तीचं नाव ऐकलं तर तुम्हाला आश्चर्य वाटेल. त्यांचं नाव आहे मिलिंद नार्वेकर. होय, शिवसेना पक्षप्रमुख उद्धव ठाकरे किंवा युवासेना प्रमुख आदित्य ठाकरे नाही तर पक्षाचे सचिव मिलिंद नार्वेकरांसोबत फोटो काढण्यासाठी कार्यकर्त्यांनी घेराव घातला होता.

एकीकडे 'मातोश्री'वर आदित्य ठाकरे केक कापत होते, तर दुसरीकडे कार्यकर्ते मिलिंद नार्वेकर यांच्यासोबत फोटोसेशन व्यस्त होते.

केवळ पुरुष कार्यकर्तेच नाही तर महिला कार्यकर्त्यांनीही मिलिंद नार्वेकर यांच्यासोबत फोटो काढण्यासाठी गर्दी केली होती.

परिणामी शिवसेना सचिव मिलिंद नार्वेकर आता 'मातोश्री'चे नवे सेलिब्रिटी झाल्याचं म्हटलं जात आहे.

त्यामुळे वाढदिवस आदित्य ठाकरेंचा जरी असला तरी फोटोंसाठी गर्दी मिलिंद नार्वेकरांकडेच झालेली पाहायला मिळाली.

युवासेना अध्यक्ष आदित्य ठाकरे यांचा 29वा वाढदिवस काल (13 जून) साजरा झाला. वाढदिवसानिमित्त आदित्य ठाकरे यांच्यावर राज्यभरातून शुभेच्छांचा वर्षाव झाला.

आदित्य ठाकरेंनी मातोश्रीवर मीडियाच्या उपस्थितीत केकही कापला. वाढदिवस आदित्य ठाकरे यांचा असला तरी फोटो काढण्यासाठी एका व्यक्तीकडे मोठी गर्दी उसळली होती.