SRH vs KKR : दोन कॅप्टन एक ट्रॉफी, श्रेयस अय्यर अन् पॅट कमिन्सच्या फोटोशूटमध्ये चेन्नईची खास झलक, फायनलपूर्वी फोटो समोर

कोलकाता नाईट रायडर्स आणि सनरायजर्स हैदराबाद आयपीएल फायनलमध्ये आमने सामने येणार आहेत. उद्या चेन्नईच्या एम. चिदंबरम स्टेडियमवर ही मॅच होणार आहे. यापूर्वी चेन्नईच्या समुद्र किनाऱ्यावर दोन्ही टीमच्या कॅप्टनचं फोटोशूट करण्यात आलं.

कोलकाता नाईट रायडर्सनं दोनवेळा आयपीएलचं विजेतेपद पटकावलं आहे. तर सनरायजर्स हैदराबादनं एकदा विजेतेपद मिळवलेलं आहे.

उद्या चेन्नईमध्ये होणाऱ्या फायनलमध्ये केकेआरचं नेतृत्त्व श्रेयस अय्यर तर हैदराबादचं नेतृत्त्व पॅट कमिन्स करणार आहे. पॅट कमिन्सला हैदराबादनं नेतृत्त्वाची संधी दिल्यानंतर गेल्यावर्षीच्या आयपीएलमध्ये दहाव्या स्थानावर असलेली टीम यावेळी अंतिम फेरीत पोहोचलीय.

श्रेयस अय्यर गेल्या आयपीएलमध्ये दुखापतग्रस्त असल्यानं खेळू शकला नव्हता. यावेळी श्रेयस अय्यरनं कोलकाता नाईट रायडर्सचा मेंटॉर गौतम गंभीर याच्या मार्गदर्शनाखाली टीमला अंतिम फेरीच्या लढतीत पोहोचवलंय.

कोलकाता नाईट रायडर्सनं क्वालिफायर-1 मध्ये सनरायजर्स हैदराबादला पराभूत केलं. केकेआरचा त्याचीच पुनरावृत्ती करण्याचा प्रयत्न असेल. तर, हैदराबादचा क्वालिफायर-1 मधील पराभवाचा वचपा काढण्याचा प्रयत्न असेल.