PHOTO : विठुराया-रुक्मिणी मातेच्या चरणी सर्वात मोठं दान

गोरगरिबांचा देव असलेल्या पंढरपूरच्या विठूरायाच्या चरणी आजवरचे सर्वात मोठे दान अर्पण झाले आहे.

Vitthal Temple Donation

गोरगरिबांचा देव असलेल्या पंढरपूरच्या विठुरायाच्याचरणी आजवरचे सर्वात मोठे दान अर्पण झाले आहे.

जालना इथल्या एका महिला भाविकाने विठ्ठल रुक्मिणी चरणी हे दान अर्पण केले आहे.

यात जवळपास पावणदोन कोटी रुपयांच्या सोने चांदीच्या दागिन्यांचा समावेश आहे.

विशेष म्हणजे या भाविकाने आपले नाव गुप्त ठेवण्याची अट घातली असून या गुप्तदानासाठी कोणताही सत्कार स्वीकारण्यासही या दात्याने नम्रपणे नकार दिला आहे.

आज वसंतपंचमीच्या मुहूर्तावर विठुराया आणि रुक्मिणी मातेच्या विवाहनिमित्त ही अनमोल भेट जालन्यातील महिला भाविकाने अर्पण केली आहे.

या दानामध्ये विठ्ठल आणि रुक्मिणी यांना सोन्याचे मुकुट, विठ्ठल आणि रुक्मिणी मातेला मोहोन माळ, रुक्मिणी मातेला कोल्हापुरी साज, पाटल्या, बांगड्या, मंगळसूत्र, जोडवी असे सोन्याचे दागिने दिले आहेत.

याशिवाय देवाच्या नित्योपचारासाठी चांदीचे मोठे ताट, वाटी, समई, तांब्या, भांडी, ताम्हण, पळी आणि देवाचा चांदीचा आरसा अशा किमती वस्तू देखील अर्पण केल्या आहेत.

खरंतर पंढरपूरचा विठूराया तसा नवसाचा देव कधीच नाही मात्र तरीही देशभरातील भाविक देवाला आपल्या इच्छा साकडे घालतात आणि देव त्यांच्या इच्छांची पूर्तता देखील करतो.

अशावेळी हे भाविक देवाला बोललेले नवस मंदिरात येऊन पूर्ण करतात. काही भाविक पैसे अथवा सोन्या चांदीचे विठ्ठलाच्या चरणी अर्पण करतात.