मुंबई दौऱ्यावेळी अमित शाहांची मुख्यमंत्री, उपमुख्यमंत्र्यांच्या घरी हजेरी; आवर्जुन उपस्थित राहत गणरायाचं घेतलं दर्शन

CM Eknath Shinde : मुंबई : केंद्रीय गृहमंत्री अमित शाह सध्या मुंबई दौऱ्यावर आहेत. यावेळी त्यांनी लालबागच्या राजाचं दर्शन घेतलं.

मुंबई दौऱ्यावर असताना अमित शाह यांनी मुख्यमंत्री एकनाथ शिंदे यांच्या निवासस्थानी जात गणरायाचं दर्शन घेतलं.

केंद्रीय गृहमंत्री अमित शाह यांनी आज मुख्यमंत्र्यांच्या वर्षा निवासस्थानी भेट देत गणरायाचे दर्शन घेतलं. यावेळी मुख्यमंत्री एकनाथ शिंदे यांनी गृहमंत्री शाह यांचं स्वागत केलं.

मुख्यमंत्र्यांच्या स्नुषा वृषाली शिंदे यांनी गृहमंत्री शाह यांचे औक्षण करीत स्वागत केलं.

तसेच, त्यांना 'शासन आपल्या दारी' पुस्तकाची प्रत आणि गणपतीची मूर्ती भेट म्हणून देण्यात आली.

गृहमंत्री शाह यांच्या हस्ते गणपतीची आरती करण्यात आली. यावेळी मुख्यमंत्री एकनाथ शिंदे आणि खासदार डॉ. श्रीकांत शिंदे यांच्या हस्ते केंद्रीय गृहमंत्री शाह यांचे शाल, श्रीफळ देवून सत्कार करण्यात आला.

यावेळी राज्याचे उपमुख्यमंत्री देवेंद्र फडणवीस, मंत्री दीपक केसरकर, मंगल प्रभात लोढा, माजी केंद्रीय राज्यमंत्री रावसाहेब दानवे, आमदार चंद्रशेखर बावनकुळे आदी मान्यवर उपस्थित होते.

अमित शाहांनी सपत्नीक लालबागच्या राजाचं दर्शन घेतलं, यावेळी मुख्यमंत्री एकनाथ शिंदें, उपमुख्यमंत्री देवेंद्र फडणवीसही उपस्थित होतं.

त्यासोबतच, केंद्रीय गृहमंत्री अमित शाह यांनी राज्याचे गृहमंत्री देवेंद्र फडणविस यांच्या सागर या शासकीय निवासस्थानी गणपतीचं दर्शन घेतलं. त्यावेळी त्यांनी संपूर्ण फडणवीस परिवाराची आस्थेनं विचारपूस केली.