Nashik Restaurant : रेल्वे बोगीतलं हे भन्नाट रेस्टॉरंट पाहिलंत का? नाशिकरोड रेल्वेस्टेशनवर अनोखा प्रयोग, फोटो एकदा पहाच

नाशिकरोड रेल्वेस्थानकावरील ट्रेन रेस्टॉरंट एका थांबलेल्या ट्रेनच्या डब्यात जेवणाचा अनोखा अनुभव तुम्हाला देतं. एसी रेस्टॉरंट असून 24 तास खुले राहणार आहे.

हे रेस्टॉरंट नाशिक शहरातील नाशिकरोड रेल्वेस्थानकाच्या बाजूलाच आहे. नावावरूनच लक्षात येत असेल की याचा रेल्वेशी थेट संबंध आहे.

आश्चर्यकारक आणि सुंदर वातावरणासह विविध प्रकारच्या पाककृती तुम्हाला इथं खायला मिळतात. ट्रेनच्या डब्यात कल्पकतेने डिझाइन केलं असून तुम्ही एखाद्या रेल्वे डब्यातच जेवताय याची अनुभूती इथं होते.

या रेल्वेच्या बोगीला अनोख्या पद्धतीने रंगविण्यात आले असून नाशिक शहरातील अनेक रामकुंड, गोदावरी, त्र्यंबकेश्वर, काळाराम मंदिर आदी ठिकाणांची चित्रे काढण्यात आली आहे.

त्याचप्रमाणे रेस्टॉरंटच्या आतील भागात देखील चांगल्या प्रकारचे इंटिरिअर तयार करण्यात आले आहे. रेल्वेच्या बोगीत ज्या गोष्टी आपल्याला पहायला मिळतात, त्या सर्व गोष्टी या रेस्टॉरंटमध्ये पहायला मिळत आहेत.

प्रत्यक्ष रेल्वे बोगीत सात लोकांच्या बसण्याची व्यवस्था असून बाहेरील कोर्टमध्ये चाळीस लोक आरामशीर बसू शकतात. त्यामुळे फॅमिलीला घेऊनही जेवणाचा आस्वाद घेऊ शकता.

व्हेज, नॉनव्हेज, साऊथ इंडियन असे जवळपास सर्व प्रकारचे फूड ईथे उपलब्ध असणार आहे. तसेच 15 रुपयापासून ते 200 रुपयांपर्यंत पिझ्झा मिळणार आहे.

या रेल्वे बोगीच्या डेकोरेशनसाठी जवळपास 45 लाख रुपये खर्च आल्याचे रेस्टॉरंटमालकाने सांगितले. तसेच एका दिवसाला 5 हजार रुपये भाडे आहे.

भुसावळ येथील व्यावसायिकाने रेल्वेचं टेंडर मिळवत नाशिकरोड रेल्वेस्टेशन बाहेर चक्क रेल्वेच्या बोगीतच रेस्टॉरंट उभं केलं आहे.

ऑफ ट्रॅक रेल्वे कोच रेस्टॉरंट असे त्याला नाव देण्यात आले असून सध्या हे रेस्टॉरंट नाशिककरांसाठी एक आकर्षण ठरत आहे.