पालिका आणि जनतेला सहकार्य करा, अन्यथा.... बिग बी यांच्या बंगल्याबाहेर मनसेची पोस्टरबाजी

महानायक अमिताभ बच्चन यांत्या प्रतीक्षा बंगल्यासमोर मनसेकडून पोस्टरबाजी करण्यात आली आहे.

संत ज्ञानेश्वर मार्गाचे रुंदीकरण करण्यास मुंबई महानगरपालिकेला सहकार्य करावं असे आवाहन या पोस्टरच्या माध्यमातून करण्यात आलं आहे.

मनसेच्या विभागअध्यक्ष मनिष धुरी यांच्या माध्यमातून प्रतीक्षा बंगल्याच्या समोर ही पोस्टरबाजी करण्यात आली.

बिग “बी” आपला “बिग” हार्ट दाखवा, मोठे महानायक आपला मोठेपणा दाखवा हीच “प्रतीक्षा”, अमिताभ बच्चन यांनी संत ज्ञानेश्वर मार्गाचे रुंदीकरण करण्यासाठी मुंबई महानगरपालिका आणि जनतेला सहकार्य करावे, अशा आशयाचे पोस्टर परिसरात मनसेकडून लावण्यात आले आहे.

संत ज्ञानेश्वर मार्गावर वाहतूक कोंडी होते आहे. या वाहतूक कोंडीमुळे लोकांना नाहक त्रास सहन करावा लागत आहे. जर या रस्त्याचे रुंदीकरण झाले तर परिसराती वाहतूक कोंडी आणि लोकांचा त्रास देखील कमी होईल. यासाठी मनसेने आता आक्रमक भूमिका घेतली आहे.

मुंबई महानगरपालिकाने जर या रस्ता रुंदीकरणासाठी महानायक अमिताभ बच्चन यांचा प्रतीक्षा बंगल्याच्या भिंतीवर कारवाई नाही केली तर येणाऱ्या काळात मनसे मुंबई महानगरपालिकावर तीव्र आंदोलन करेल, अशा देखील इशारा मनसे विभाग अध्यक्ष मनीष धुरी यांनी दिली आहे.