Mumbai : मुंबईत विविध फुलझाडांचं प्रदर्शन; निसर्ग संवर्धनाच्या जनजागृतीसाठी एमएमआरडीएचा अनोखा उपक्रम

मुंबई महानगर प्रदेश विकास प्राधिकरणामार्फत महाराष्ट्र निसर्ग उद्यान येथे तीन दिवसीय प्रदर्शनाचं आयोजन करण्यात आलं.

या प्रदर्शनात महाराष्ट्र निसर्ग उद्यान संस्था येथे विविध औषधी तसेच फुलझाडांचे प्रदर्शन करण्यात आले.

महानगर आयुक्त एस. व्ही. आर. श्रीनिवास भा. प्र.से. यांच्या हस्ते प्रदर्शनाचं उद्घाटन पार पडलं आणि नंतर मुंबईकरांसाठी हे उद्यान खुलं करण्यात आलं.

प्रदर्शनाचं हे पहिलंच वर्ष असून, हे प्रदर्शन मुंबईकरांसाठी विनामूल्य असणार आहे.

कुंड्यांमध्ये वाढविलेली फळझाडे आणि फुलझाडे, फळभाज्यांची झाडे, मोसमी फुलझाडे, औषधी वनस्पती, बोनसाय तसेच कृष्णवडासारख्या अनेक दुर्मिळ देशी प्रजातींची झाडे मुंबईकरांना पाहता येणार आहेत.

कुंड्यामध्ये वाढलेल्या फळभाज्या पालेभाज्या आणि विदेशी वनस्पती, फळझाडे, हंगामी फुलझाडे, शोभिवंत पानाची झाडे, सुगंधी आणि औषधी वनस्पती, गुलाबाची रोपे यांचे शेकडो प्रकार मुंबईकरांना या प्रदर्शनात पाहायला मिळणार आहेत.

तसेच मुंबई बटुवृक्ष (बोन्साय) या प्रजातीच्या झाडांचे देखील समावेश असणार आहे.

लहान मुलांना आकर्षित करण्यासाठी या ठिकाणी फुलांनी सजविलेला हत्ती आणि मोर ठेवण्यात आले आहेत.

या प्रदर्शनात सनटेक, गोदरेज, हिरानंदानी, BARC, मुंबई रोझ सोसायटी, इंडियन बोन्साय सोसायटी, टाटा पॉवर, भारत डायमंड बोर्स, मुंबई महानगरपालिका, सोमय्या महाविद्यालय अशा संस्थांनी भाग घेतला आहे.