09 बकऱ्या फस्त करणारा महाकाय अजगर पकडण्यास यश

तब्बल 09 बकऱ्या फस्त करणाऱ्या एका महाकाय अजगराला पकडण्यात चंद्रपूर जिल्ह्यात यश आलंय.

Chandrapur

तब्बल 09 बकऱ्या फस्त करणाऱ्या एका महाकाय अजगराला पकडण्यात चंद्रपूर जिल्ह्यात यश आलंय.

ब्रम्हपुरी तालुक्यातील उचली गावातून हा १२ फूट लांब अजगर पकडण्यात आलाय. गेल्या वर्षभरापासून उचली गावात या अजगराची मोठी दहशत होती.

गावाच्या अगदी जवळ अजगराचा वावर असल्याने गावकरी शेतात जायला घाबरायचे, तसेच लहान मुलांना लगतच्या भागात जाण्यास प्रतिबंध करण्यात आला होता.

वर्षभरात या अजगराने एक-एक करत गावातील तब्बल 09 बकऱ्या फस्त केल्या होत्या. काल देखील या अजगराने मिनाक्षी ढोंगे या शेतकरी महिलेची बकरी फस्त केली.

सदर माहिती अर्थ कंजरवेशन ऑर्गनायझेशन संस्थेचे अध्यक्ष श्री मनोज वठे यांना देण्यात आली.

माहिती मिळताच सर्पमित्र ललित उरकुडे, विवेक राखडे, चेतन राखडे व ईशान वठे यांनी घटनास्थळावर धाव घेतली.

मात्र अंधार व नाल्याची बाजू असल्याने सुरक्षित पणे अजगराला पकडण्यास अडचण होत होती तरीसुद्धा अर्थ कंजरवेशन ऑर्गनाझेशन या सर्पमित्र संस्थेच्या कार्यकर्त्यांनी अतिशय शिताफीने या अजगराला जेरबंद केले.

महाकाय अजगर जेरबंद झालेला बघून गावकऱ्यांनी एकच जल्लोष केला व संस्थेच्या सर्व कार्यकर्त्यांचे आभार मानले.

हा अजगर तब्बल १२ फूट लांबीचा होता. विशेष म्हणजे या आकाराचा अजगर ब्रम्हपुरी भागात आढळल्याची ही पहिलीच नोंद आहे.

अजगराला वनपरिक्षेत्र अधिकारी श्री. सेमस्कर साहेब, वनरक्षक श्री. संभाजी बळदे यांच्या उपस्थितीत सुरक्षितपणे गुप्त स्थळी सोडून देण्यात आले. या बचाव कार्यात क्रिष्णा धोटे व गावचे पोलीस पाटील संघर्ष जगझापे यांचे विशेष सहकार्य लाभले.