Varun Dhawan : मुंबई मेट्रोमध्ये स्टंट महागात! वरुण धवनला MMMOCL कडून कारवाईचा इशारा

Varun Dhawan : मुंबई मेट्रोमध्ये स्टंट महागात! वरुण धवनला MMMOCL कडून कारवाईचा इशारा

वरुण धवनचा मेट्रोतील स्टंट व्हिडीओ व्हायरल

सध्या ‘बॉर्डर 2’ चित्रपटामुळे चर्चेत असलेला अभिनेता वरुण धवन मुंबई मेट्रोमध्ये केलेल्या एका स्टंटमुळे अचानक वादाच्या भोवऱ्यात सापडला आहे.

मेट्रोच्या कोचमध्ये ग्रॅब हँडलला लटकून पुल-अप करतानाचा त्याचा व्हिडीओ सोशल मीडियावर मोठ्या प्रमाणात व्हायरल झाला असून, यामुळे चाहत्यांमध्ये संमिश्र प्रतिक्रिया उमटताना दिसत आहेत.

काही जणांनी वरुणच्या फिटनेसप्रेमाचं कौतुक केलं असलं, तरी सार्वजनिक वाहतुकीत अशा प्रकारे वागणं धोकादायक असल्याचं म्हणत अनेकांनी त्याच्यावर टीकाही केली आहे

या संपूर्ण प्रकाराची गंभीर दखल महामुंबई मेट्रो ऑपरेशन्स कॉर्पोरेशन लिमिटेड (MMMOCL) यांनी घेतली असून, त्यांनी अधिकृत सोशल मीडिया अकाउंटवरून याबाबत स्पष्ट इशारा दिला आहे.

MMMOCL ने सांगितलं की मेट्रोमधील ग्रॅब हँडल हे प्रवाशांनी प्रवासादरम्यान तोल सांभाळण्यासाठी लावलेले असतात, व्यायाम किंवा करमणुकीसाठी त्यांचा वापर केल्यास इतर प्रवाशांच्या सुरक्षिततेला धोका निर्माण होऊ शकतो.

प्रशासनाने स्पष्ट केलं आहे की अशा प्रकारचं वर्तन मेट्रो रेल्वे (ऑपरेशन्स अँड मेंटेनन्स) कायदा 2002 अंतर्गत दंडनीय गुन्हा ठरू शकतं.

परिस्थितीच्या गंभीरतेनुसार संबंधित व्यक्तीवर आर्थिक दंड किंवा कारावासाची शिक्षा होण्याचीही शक्यता असल्याचं MMMOCL ने आपल्या पोस्टमध्ये नमूद केलं आहे.

मिळालेल्या माहितीनुसार, गर्दी टाळण्यासाठी वरुण धवनने कारऐवजी मेट्रोने प्रवास करण्याचा निर्णय घेतला होता आणि त्याच प्रवासादरम्यान हा व्हिडीओ शूट करण्यात आला.

व्हिडीओ व्हायरल झाल्यानंतर हा प्रकार माध्यमांमध्येही मोठ्या प्रमाणात चर्चेत आला असून, सेलिब्रिटींनी सार्वजनिक ठिकाणी नियम पाळावेत अशी मागणी नागरिकांकडून केली जात आहे.

दरम्यान, महामुंबई मेट्रो प्रशासनाने प्रवाशांना आवाहन केलं आहे की मेट्रो प्रवासाचा आनंद घ्यावा, मात्र नियमांचे पालन करत जबाबदारीने प्रवास करावा