युद्धातून मैत्रीकडे? इराणसोबत काम करण्याची तयारी, निर्बंध सैल होण्याचे संकेत, ट्रम्प यांचा मोठा दावा

Iran US Conflict: अमेरिका-इराण युद्धबंदी जाहीर होताच ट्रम्प यांनी मोठा दावा केला. इराणसोबत सहकार्य, युरेनियम कार्यक्रमावर नियंत्रण आणि निर्बंधांमध्ये सवलत यावर चर्चा सुरू असल्याची माहिती त्यांनी दिली.

Iran US Conflict

Source : ABP Majha

Iran US Conflict : अमेरिका आणि इराण यांच्यातील तणावपूर्ण युद्धानंतर आता परिस्थिती बदलण्याची चिन्हे दिसत आहेत. दोन आठवड्यांच्या युद्धविरामानंतर अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी मोठा दावा करत दोन्ही देश आता एकत्र काम करण्याच्या दिशेने वाटचाल करत असल्याचं सांगितलं आहे.

US Iran Relations : सहकार्याच्या दिशेने पावले

डोनाल्ड ट्रम्प यांनी सोशल मीडियावर पोस्ट करत सांगितले की, इराणमध्ये सत्ताबदलाची प्रक्रिया पूर्ण झाली असून आता दोन्ही देशांमध्ये सहकार्याची नवी सुरुवात होऊ शकते. त्यांनी दावा केला की, इराणकडून युरेनियम संवर्धन थांबवले जाईल आणि अमेरिकेसोबत मिळून भूमिगत अणुसामग्री बाहेर काढण्याचे काम केलं जाईल.

यासोबतच संपूर्ण परिसरावर सॅटेलाइटद्वारे कडक नजर ठेवण्यात येत असल्याचेही डोनाल्ड ट्रम्प यांनी स्पष्ट केले. हल्ल्यानंतर संबंधित अणुस्थळांमध्ये कोणतीही छेडछाड झालेली नसल्याचा दावाही त्यांनी केला आहे.

Sanctions Relief Talks : निर्बंध आणि टॅरिफ सवलतीवर चर्चा

ट्रम्प यांनी संकेत दिले की, अमेरिका आणि इराण यांच्यात टॅरिफ आणि आर्थिक निर्बंध सैल करण्याबाबत चर्चा सुरू आहे. 15 मुद्द्यांपैकी अनेक मुद्द्यांवर सहमती झाल्याचा दावा त्यांनी केला आहे. यामुळे भविष्यात इराणवरील आर्थिक दबाव कमी होण्याची शक्यता व्यक्त केली जात आहे.

China Role In Middle East : चीनची मध्यस्थी महत्त्वाची

दरम्यान, चीननेही या घडामोडींमध्ये महत्त्वाची भूमिका बजावली असल्याचं समोर आलं आहे. चीनच्या परराष्ट्र मंत्रालयाच्या प्रवक्त्या मोओ निंग (Mao Ning) यांनी पश्चिम आशियामध्ये शांतता प्रस्थापित करण्यासाठी चीन सक्रिय असल्याचे सांगितलं. चीन सातत्याने युद्धविराम आणि चर्चेच्या माध्यमातून तोडगा काढण्याचा प्रयत्न करत असून खाडी प्रदेशात स्थिरता निर्माण करण्यासाठी पुढाकार घेत असल्याचे त्यांनी स्पष्ट केलं.

Ceasefire Impact : युद्धविरामानंतरची नवी समीकरणे

सुमारे 40 दिवस चाललेल्या संघर्षानंतर जाहीर झालेला युद्धविराम हा महत्त्वाचा टप्पा मानला जात आहे. या सीजफायरमुळे होर्मुझ सामुद्रधुनी पुन्हा खुली होण्याची शक्यता आहे, ज्याचा थेट परिणाम जागतिक ऊर्जा बाजारावर होऊ शकतो. 

तज्ज्ञांच्या मते, युद्धानंतर अचानक सहकार्याची भाषा सुरू होणे हे आंतरराष्ट्रीय राजकारणात मोठं वळण ठरू शकतं. मात्र, हा करार किती टिकाऊ ठरेल, हे येत्या काही दिवसांत स्पष्ट होणार आहे.

ही बातमी वाचा: