Ukraine Drone Attack: यूक्रेनचा हजारो ड्रोनद्वारे रशियावर सर्वात मोठा हल्ला, 1900 ड्रोन रोखल्याचा रशियाचा दावा, 2 जणांचा मृत्यू
Ukraine Drone Attack : यूक्रेननं रशियावर सर्वात मोठा हल्ला केला आहे. रशियाच्या हल्ल्यात 2 रशियन नागरिकांचा मृत्यू झाला आहे.
मॉस्को: यूक्रेननं रशियावर आतापर्यंतचा सर्वात मोठा ड्रोन हल्ला केला आहे. यूक्रेननं हजारो ड्रोन रशियाच्या दिशेने सोडले. आतापर्यंतच्या माहितीनुसार रशियाकडून यूक्रेनचे 1900 ड्रोन रोखण्यात आले आहेत. यूक्रेनच्या ड्रोन हल्ल्यात 2 रशियन नागरिकांचा मृत्यू झाला आहे. रशियातील संसदीय निवडणुकींच्या अखेरच्या दिवशी मॉस्कोत ड्रोन हल्ले करण्यात आले. एका मोठ्या रिफायनरीचं नुकसान देखील झालं आहे. मॉस्कोचे महापौर सर्गेई सोब्यानिन यांनी ड्रोन हल्ल्यांसदर्भात माहिती दिली.
यूक्रेनच्या अधिकाऱ्यांनी रात्रभर रशियाकडून कीव्हवर हल्ले करण्यात आल्याचं सांगितलं आहे. रशियाच्या हल्ल्यात चार जणांचा मृत्यू झाला, त्यात तीन लहान मुलांचा समावेश होता. रशिया आणि यूक्रेनकडून एकमेकांवरील हल्ले तीव्र केले जात आहेत.
मॉस्कोच्या गव्हर्नरनं काय म्हटलं?
मॉस्कोचे गव्हर्नर आंद्रे वोरोब्योव यांनी सोशल मीडियावर पोस्ट करत म्हटलं की ड्रोन हल्ला हा मोठा हल्ला होता. यूक्रेनच्या हल्ल्यात एका 44 वर्षीय महिलेचा आणि एका ज्येष्ठ नागरिकाचा मृत्य झाला आहे. वोरोब्योव यांनी म्हटलं की एका 21 मजली इमारतीला ड्रोनच्या हल्ल्यामुळं आग लागली, तिथून 400 लोकांना बाहेर काढण्यात आलं. मॉस्को ऑइल रिफायनरीच्या एका भागात नुकसान झालं असून आपत्कालीन सेवा कार्यरत असल्याचं त्यांनी म्हटलं. यूक्रेननं यापूर्वी देखील या रिफायनरीवर हल्ले केले आहेत. ड्रोन हल्ल्याद्वारे यूक्रेनचा रशियाच्या निवडणुकीत हस्तक्षेपाचा प्रयत्न असल्याचा आरोप देखील वोरोब्योव यांनी केला. मात्र, त्यांना यात यश आलं नाही, असंही ते म्हणाले.
यूक्रेनचे राष्ट्रपती काय म्हणाले?
यूक्रेनचे राष्ट्रपती वोलोदिमीर झेलेन्स्की यांनी ड्रोन हल्ल्याचं कौतुक केलं आहे. ते म्हणाले की काल रात्री मॉस्कोमध्ये आमच्या हल्ल्याचा चांगला परिणाम दिसून आला. रशियन तेल ठिकाणांच्या महत्त्वाच्या ठिकाणी आणि लॉजिस्टिक सेंटरवर हल्ला करण्यात आला.
दरम्यान, RIA नोवोस्ती वृत्तसंस्थेनं त्यांच्या रिपोर्टमध्ये म्हटलं की रशियाच्या केंद्रीय निवडणूक आयोगाच्या प्रमुखांनी म्हटलं यूक्रेनच्या खेरसॉनवर रशियाचा कब्जा असून तिथ एका प्रवासी बसवर ड्रोन हल्ला झाला, ज्यात दोघांचा मृत्यू झाला. मृतांमध्ये एक निवडणूक अधिकारी देखील होता.
Before You Go
Sanjay Raut On Amit Shah : अमित शाह यांचे डोळे म्युझियममध्ये ठेवले पाहिजे; संजय राऊत यांची टीका
महत्त्वाच्या बातम्या
