ट्रम्प- मोदींच्या भेटीची तारीख निश्चित, 25 जूनपासून मोदी अमेरिका दौऱ्यावर

नवी दिल्ली : पंतप्रधान नरेंद्र मोदी 25 जूनपासून दोन दिवसांच्या अमेरिका दौऱ्यावर जाणार असून, 26 जून रोजी मोदी आणि अमेरिकेचे राष्ट्राध्यक्ष डोनाल्ड ट्रम्प यांची भेट होईल. गेल्याच महिन्यात अमेरिकेच्या परराष्ट्र विभागाकडून याबाबतचे संकेत देण्यात आले होते. डोनाल्ड ट्रम्प यांनी अमेरिकेची राष्ट्राध्यक्षपदाची सूत्रं घेतल्यानंतर, पंतप्रधान मोदी पहिल्यांदाच अमेरिका दौऱ्यावर जात आहेत. ट्रम्प यांनी 20 जानेवारी रोजी पंतप्रधान मोदींना अमेरिका भेटीचं निमंत्रण दिलं होतं. याशिवाय दोन्ही नेत्यांमध्ये आजपर्यंत तीनवेळा फोनवरुन विविध विषयांवर चर्चा झाली आहे. भारतीय परराष्ट्र विभागाकडून मिळालेल्या माहितीनुसार, 26 जून रोजी ट्रम्प आणि मोदींची भेट होईल. यावेळी दोन्ही नेत्यांमध्ये अनेक महत्त्वाच्या मुद्द्यांवर चर्चा होण्याची शक्यता आहे. अमेरिकेने स्वत: ला पॅरिस करारापासून वेगळं केल्यानंतर मोदी आणि ट्रम्प यांची पहिल्यांदाच भेट असल्याने, या भेटीकडे सर्वांचेच लक्ष लागून आहे. कारण पॅरिस करारातून अमेरिकेने बाहेर पडण्याच्या निर्णयाची घोषणा करताना भारत आणि चीनवर निशाणा साधला होता. या करारातून अमेरिकेच्या एक्झिटचा सर्वाधिक फायदा भारत आणि चीनला होणार असून, या करारातील अटींमुळे अमेरिकेचं मोठं नुकसान झाल्याचं ते यावेळी म्हणले होते. याशिवाय H1-B व्हिसासंदर्भात अमेरिकेने कठोर भूमिका घेतल्याच्या पार्श्वभूमीवरही मोदी आणि ट्रम्प यांची भेट महत्त्वाची ठरणार आहे. दरम्यान, यापूर्वी अमेरिकेचे माजी राष्ट्राध्यक्ष बराक ओबामा आणि पंतप्रधान मोदींची आठवेळा भेट झाली आहे. यात पंतप्रधान मोदींनी तीनवेळा अमेरिकेचा दौरा केला, यावेळी त्यांनी वॉशिंग्टनमध्ये ओबामांची भेट घेतली होती. तर 2015 मध्ये पंतप्रधान मोदींच्या निमंत्राणावर ओबामा भारतात आले होते. संबंधित बातम्या पॅरिस करारातून बाहेर पडण्याचा ट्रम्प प्रशासनाचा निर्णय आर्थिक मदतीसाठी भारतानं पॅरिस करारावर स्वाक्षरी केली नाही : सुषमा स्वराज