इस्लामाबाद : पाकिस्तानमधील बलुचिस्तानमध्ये (Pakistan Balochistan Attack) एक धक्कादायक घटना घडलीआहे. येथे नैऋत्य पाकिस्तानमध्ये शस्त्रधारी दहशतवाद्यांनी तब्बल 23 जणांना गोळ्या झाडून ठार केलंय. वाहनाच्या खाली जबरदस्तीने उतरायला लावून अतिरेक्यांनी हे भीषण कृत्य केले आहे. या घटनेनंतर संपूर्ण पाकिस्तान हादरला आहे. सोमवारी (26 ऑगस्ट) ही घटना घडली.
प्रदेश, वांशिक माहिती विचारून गोळीबार
एएफपी या वृत्तसंस्थेने दिलेल्या वृत्तानुसार बलुचिस्तान प्रांतातील मुसाखैल जिल्ह्यात हा धक्कादायक प्रकार घडला. या भागात काही लोक ट्रक, व्हॅनमधून प्रवास करत होते. यावेळी अचानकपणे काही अतिरेक्यांनी येत या लोकांना थांबवले आणि त्यांची वांशिक माहिती विचारली. त्यानंतर या लोकांवर थेट गोळीबार करण्यात आला. या गोळीबारात एकूण 23 जण मृत्युमुखी पडले आहेत. तर एकूण पाच जण जखमी झाले.
लोकांना थांबवून केला गोळीबार
"अतिरेक्यांनी बस, ट्रक्स आणि व्हॅन्सना थांबवून लोकांवर थेट गोळीबार केला. यात साधारण 22 जणांचा मृत्यू झाला आहे. पंजाब आणि बलुचिस्तान यांना जोडणाऱ्या एका महामार्गावर ही घटना घडली आहे," अशी माहिती नजीबुल्लाह काकर या पाकिस्तानी अधिकाऱ्याने दिली. या महामार्गावरून प्रवास करणाऱ्या वाहनांना थांबवण्यात आले. अतिरेक्यांनी या प्रवाशांना त्यांचा पत्ता विचारला. जे लोक पाकिस्तानमधील पंजाब प्रांतातील होते, त्यांनाच गोल्या घालून ठार मारण्यात आलं आहे.
हल्ल्याच्या मागे बीएलए दहशवादी संघटना?
या घटनेच्या मागे बीएलए (बलुच लिबरेशन आर्मी) या संघटनेचा हात असल्याचा संशय व्यक्त केला जात आहे. लोकांवर हल्ला झालेल्या या प्रांतात बीएलए ही सक्रिय असलेली अतिरेकी संघटना आहे. ही घटना घडताच बलुचिस्तानचे मुख्यमंत्री सरफराज बुगती यांनी प्रतिक्रिया दिली आहे. या घटनेचा त्यांनी तीव्र निषेध व्यक्त केला आहे. मृतांच्या नातेवाईकांप्रती त्यांनी संवेदना व्यक्त केल्या आहेत. या घटनेत सहभागी असलेल्या अतिरेक्यांना आम्ही सोडणार नाही. त्यांना योग्य ती शिक्षा होईल, असे आश्वासन सरफराज बुगती यांनी दिले आहे. या घटनेचा संपूर्ण पाकिस्तानात निषेध व्यक्त केला जातोय.
हेही वाचा :
VIDEO :युक्रेनचा रशियावर अमेरिकेच्या 9/11 सारखाच भयावह हल्ला; प्रसिद्ध 38 मजली इमारतीत ड्रोन घुसलं