ड्रॅगन्सबाबत संशोधन करण्यासाठी आपल्या टेलिकायनेटिक शक्ती प्रदान कराव्यात अशी अजब मागणी व्हिक्टोरिया नावाच्या विद्यार्थिनीने पत्रातून केली होती. पत्रासोबत तिने पाच न्यूझीलंड डॉलर (अंदाजे 230 रुपये) पाठवले होते. टेलिकायनेटिक म्हणजेच अंतर्मनाच्या शक्तीने वस्तू हलवण्याची क्षमता.
जेसिंडा आर्डर्न यांचं विनम्र उत्तर
'सायकिक आणि ड्रॅगनबाबत तुझ्या सूचना ऐकून आम्हाला कुतूहल वाटलं. मात्र दुर्दैवाने आम्ही याबाबत कोणतंही संशोधन कार्य करत नाही आहोत. त्यामुळे मी तू पाठवलेली लाच परत करत आहे. भविष्यात टेलिकायनेसिस, टेलिपथी आणि ड्रॅगन या विषयावर संशोधन करण्यासाठी तुला शुभेच्छा' अशा आशयाचं उत्तर अधिकृत लेटरहेडवरुन जेसिंडा यांनी हस्ताक्षरात पाठवलं.
पदावर असताना प्रसुत होणाऱ्या न्यूझीलंडच्या पहिल्या पंतप्रधान
विशेष म्हणजे, या चिमुरडीच्या बालसुलभ कुतूहलाला धक्का पोहचणार नाही, याची पुरेपूर काळजीही अॅडर्न यांनी घेतली. पत्राखाली ताजा कलम लिहिताना 'मी त्या ड्रॅगन्सवर डोळा ठेवून असेन, ते सूट्स घालतात का?' असा प्रश्न आर्डर्न यांनी विचारला.
नेटफ्लिक्सवरील 'स्ट्रेंजर थिंग्स' या साय-फाय सिरीजमुळे व्हिक्टोरियाला या विषयात रस निर्माण झाल्याचं तिच्या मोठ्या भावाने सांगितलं.
जेसिंडा यांचा अल्प परिचय
जेसिंडा आर्डर्न या पदावर असताना प्रसुत झालेल्या न्यूझीलंडच्या पहिल्या पंतप्रधान आहेत. बॉयफ्रेण्ड आणि टेलिव्हिजन प्रेझेंटर क्लार्क गेफोर्ड यांच्यासोबत जेसिंडा यांचा नुकताच साखरपुडा झाला. आर्डर्न यांच्या मुलीचा जून 2018 मध्ये जन्म झाला होता. त्यांची मुलगी नीव्ह आता दहा महिन्यांची आहे.
न्यूझीलंडमध्ये 1893 साली महिलांना मतदानाचा अधिकार देण्यात आला होता. आर्डर्न या देशाच्या तिसऱ्या महिला पंतप्रधान आहेत.
2016 साली पंतप्रधानपदाची सूत्रं हाती घेताना आर्डर्न या पंतप्रधानपदी विराजमान होणाऱ्या न्यूझीलंडच्या सर्वात तरुण व्यक्ती ठरल्या होत्या. पंतप्रधानपद काबीज करण्याच्या अवघ्या सहाच दिवस आधी त्यांना आपण गरोदर असल्याचं समजलं होतं.
पदावर असताना प्रसुत होणाऱ्या त्या न्यूझीलंडच्या पहिल्याच, तर जगभरातील दुसऱ्याच पंतप्रधान (किंवा लोकशाही पद्धतीने नियुक्त सर्वोच्च पदावरील व्यक्ती) ठरल्या आहेत. यापूर्वी 1990 मध्ये पाकिस्तानच्या पंतप्रधान बेनझीर भुत्तो यांनी पदावर असताना बाळाला जन्म दिला होता.