शाळेत रसायनशास्त्राच्या तासाला कठीण रासायनिक संज्ञा पाठ करताना अनेकांच्या नाकी नऊ यायचे. मात्र H20 हा पाण्याचा फॉर्म्युला तुलनेने सोपा. सहसा कोणी विसरणार नाही, असा मानला जातो. मात्र 'मिस वर्ल्ड बांग्लादेश' या ब्यूटी काँटेस्टमध्ये प्रश्नोत्तराच्या फेरीत सौंदर्यवती या प्रश्नाला अडखळली.
परीक्षकाने प्रश्न पुन्हा विचारला आणि ती प्रश्न घोळवत राहिली, काहीशी हसली. परीक्षक अवाक झाले आणि त्यांनी प्रश्नाचं उत्तर देऊन टाकलं. यावर तिने सारवासारव करण्याचा प्रयत्नही केला. ढाक्यातील धानमोंडीमध्ये याच नावाचं रेस्टॉरंट असल्यामुळे मी गोंधळले, असं तिने बंगालीत सांगितलं.
काही वेळातच तिचा हा व्हिडिओ सोशल मीडियावर व्हायरल झाला. बहुतांश नेटिझन्सनी तिची खिल्ली उडवण्यात धन्यता मानली. कोणी तिच्यात आत्मविश्वास नसल्यावर बोट ठेवलं, तर कोणी ती घाबरली असेल, अशा कठीण प्रसंगी कोणीही गांगरतं, असं म्हणत तिची बाजू सावरुनही धरली. पण सोशल मीडियावर चर्चा झाली हे निश्चित.