Joe Biden No to Presidential Election: अमेरिकेच्या निवडणुका (US Elections) तोंडावर आल्या असून सध्या जगातील महासत्ता म्हणून ओळखल्या जाणाऱ्या देशातील राजकारणात मोठी उलथापालथ पाहायला मिळत आहे. काही दिवसांपूर्वी अमेरिकेचे (America) माजी राष्ट्राध्यक्ष डोनाल्ड ट्रम्प (Donald Trump) यांच्यावर भर सभेत हल्ला करण्यात आला. तेव्हापासूनच अमेरिकेचं राजकारण तापल्याचं पाहायला मिळत होतं. अशातच आता अमेरिकेचे राष्ट्राध्यक्ष जो बायडन (Joe Biden) यांच्या एका घोषणेनं प्रचंड खळबळ माजल्याचं पाहायला मिळत आहे.
अमेरिकेचे राष्ट्राध्यक्ष जो बायडन यांनी रविवारी एक मोठी घोषणा केली. त्यांनी 2024 मध्ये होणाऱ्या अमेरिकेच्या अध्यक्षपदाच्या निवडणुकीतून आपलं नाव मागे घेत असल्याचं जाहीर केलं आहे. यासोबतच त्यांनी अमेरिकेच्या अध्यक्षपदाच्या निवडणुकीत आता दावेदार नसल्याचंही स्पष्ट केलं आहे. बायडन यांच्यानंतर कमला हॅरिस या राष्ट्राध्यक्ष पदासाठी पुढील दावेदार असतील. गेल्या काही दिवसांपासून पक्षातील नेतेमंडळीच बायडन यांच्यावर दबाव आणत असल्याचं बोललं जात होतं. त्याचवेळी जो बायडन यांनी हा निर्णय घेतल्यामुळे अमेरिकेच्या राजकारणत प्रचंड उलथापालथ पाहायला मिळत आहे. जो बायडन यांच्या सहकाऱ्यांनीच आगामी निवडणुकीत डोनाल्ड ट्रम्प यांच्या विरोधात ते कमकुवत उमेदवार असल्याचं सांगितलं होतं.
अमेरिकेचे राष्ट्राध्यक्ष जो बायडन यांच्या घोषणेपासून अमेरिकेच्या अध्यक्षपदाच्या निवडणुकीत अत्यंत रंजक वळण पाहायला मिळत आहे. अमेरिकेचे विद्यमान राष्ट्राध्यक्ष जो बायडन यांनी आगामी अध्यक्ष पदाची निवडणूक न लढवण्याचा निर्णय घेतला आहे. यंदाची राष्ट्राध्यक्ष पदाची निवडणूक ते लढवणार नसल्याचं त्यांनी जाहीर केलं आहे. स्वतः पत्र लिहून त्यांना हा निर्णय जाहीर केल्याची माहिती मिळत आहे. यासोबतच बायडन पुढील आठवड्यात देशाला संबोधित करणार आहेत.
आधीपासूनचं आलेलं चर्चांना उधाण
जो बायडन राष्ट्रपतीपदाची निवडणूक लढवणार की, नाही यावर बराच काळ चर्चा सुरू होती. प्रकृतीच्या कारणास्तव ते कदाचित राष्ट्रपतीपदाची निवडणूक लढवणार नसल्याच्या त्यांच्या आरोग्यासंबंधीच्या समस्यांबद्दलही चर्चा होती आणि रविवारी या चर्चांना अखेर पूर्णविराम मिळालाच. स्वतः बायडन यांनी मोठी घोषणा केली.
लाईव्ह डिबेटमध्ये अनेकदा फ्रीज झालेले बायडन
बायडन यांच्या अध्यक्षपदाच्या शर्यतीतून माघार घेतल्याची चर्चा काही दिवसांपूर्वी सुरू झाली होती. लाईव्ह डिबेटमध्येही अनेकदा बायडन यांचा गोंधळ उडाल्याचं पाहायला मिळालं होतं. लाईव्ह डिबेटमध्ये ट्रम्प यांच्यासमोर निशब्द झाले होते. निवडणुकीपूर्वी, रिपब्लिकन पक्षाचे उमेदवार डोनाल्ड ट्रम्प आणि डेमोक्रॅटिक पक्षांचे उमेदवार जो बायडन यांच्यात सर्वात आधी डिबेट झाली होती. यामध्ये डोनाल्ड ट्रम्प यांचाच वरचष्मा पाहायला मिळाला होता. अशा परिस्थितीत बायडन यांनी या शर्यतीतून माघार घ्यावी, अशा चर्चा राजकीय वर्तुळात रंगल्या होत्या.
माघार घेणार नाही; बायडन यांच्या टीमनं स्पष्ट केलेलं
डोनाल्ड ट्रम्प यांच्यासोबतच्या डिबेटनंतर न्यूयॉर्क टाईम्सनं आपल्या एडिटोरियलमध्ये म्हटलं होतं की, आपल्या देशाची सेवा करण्यासाठी राष्ट्राध्यक्ष बायडन यांनी राष्ट्राध्यक्ष पदावरुन माघार घ्यावी. यानंतर एका वर्गानं बायडन यांनी राष्ट्राध्यक्ष पदावरुन पायउतार व्हावं, अशी मागणी लावून धरली होती. परंतु, बायडन आणि त्यांच्या प्रचार समितीनं त्यावेळी म्हटलं होतं की, आम्ही हार मानणार नाही आणि शर्यतीतून माघार घेणार नाही.