Thane Politics : टीडीआरनंतर आता डेटा सेंटर घोटाळा, ठाणेकरांचा जीव धोक्यात; ॲमेझॉनच्या प्रकल्पावरुन जितेंद्र आव्हाडांचा हल्लाबोल
Thane Amazon Data Center Scam: ठाण्यात टीडीआर घोटाळ्यानंतर आता 'ॲमेझॉन मेगा डेटा सेंटर'वरून नवा वाद पेटला आहे. आमदार जितेंद्र आव्हाड यांनी ठाणेकरांच्या पाण्याचा बळी दिला जात असल्याचा गंभीर आरोप केला.
ठाणे : ठाणे महानगरपालिकेत (TMC) सध्या गाजत असलेल्या टीडीआर घोटाळ्यामुळे (TDR Scam) वनविभागासह पालिकेची नाचक्की होत असतानाच, आता पालिकेचा आणखी एक नवा कथित प्रताप उघडकीस आला आहे. अमेरिका आणि युरोपमधील काही देशांनी हद्दपार केलेला ॲमेझॉनचा (Amazon) मेगा डेटा सेंटर प्रकल्प ठाण्यात उभारण्याचा घाट घातला जात आहे, असा खळबळजनक आरोप शरद पवारांच्या राष्ट्रवादीचे राष्ट्रीय सरचिटणीस आणि आमदार जितेंद्र आव्हाड (Jitendra Awhad) यांनी केला आहे.
या डेटा सेंटरमुळे मोठ्या प्रमाणात नोकऱ्या मिळतील असा दावा केला जात असला, तरी प्रत्यक्षात केवळ 60 जणांना रोजगार मिळणार असून त्याबदल्यात 600 ठाणेकरांच्या जीवावर बेतणार आहे, असा दावा आव्हाड यांनी पत्रकार परिषदेत केला.
Thane Water Crisis : ठाणेकरांच्या हक्काचे 12 MLD पाणी डेटा सेंटरच्या घशात?
ठाणे शहरात सध्या जाणवणाऱ्या पाणीटंचाईचा दाखला देत जितेंद्र आव्हाड यांनी पालिकेच्या कारभारावर तीव्र आक्षेप घेतला. ठाणे महापालिका आयुक्तांनी स्वतः अर्थसंकल्पात शहराला आधीच 30 एम.एल.डी. (MLD) पाणी कमी पडत असल्याची कबुली दिली आहे. असे असताना तहानलेल्या ठाणेकरांच्या हक्काचे तब्बल 12 एम.एल.डी. पाणी या ॲमेझॉन डेटा सेंटरच्या घशात ओतले जाणार आहे, असा आरोप आव्हाड यांनी केला.
या प्रकल्पामुळे पाण्याचा अपव्यय तर होईलच, पण सोबतीला अमर्याद विजेचा वापर आणि दिवस-रात्र होणाऱ्या ध्वनिप्रदूषणाचा (Noise Pollution) मोठा जाच ठाणेकरांना सहन करावा लागणार आहे, असंही आव्हाड म्हणाले.
या विनाशकारी डेटा सेंटरला आमचा तीव्र विरोध आहे आणि राहील. आम्ही पालिकेच्या सभागृहात तर याविरोधात आवाज उठवूच, पण जनतेच्या दारात जाऊनही या घोटाळ्याविरोधात उग्र आंदोलन छेडू, असा इशारा जितेंद्र आव्हाड यांनी दिला. तसेच, ॲमेझॉनच्या डेटा सेंटरशेजारीच संबंधित अधिकारी आणि पदाधिकाऱ्यांची घरे बांधावीत, असा टोलाही त्यांनी लगावला.
Environmental Damage : 'ठाणेकरांच्या मुळावर उठलेला प्रकल्प'
राष्ट्रवादी काँग्रेस पक्षाचे ठाणे शहर जिल्हाध्यक्ष मनोज प्रधान यांनीही या प्रकल्पावरून पालिका प्रशासनाला धारेवर धरले. ठाणेकरांच्या जीवावर उठलेला हा प्रकल्प हवाच कशाला? असा संतप्त सवाल त्यांनी केला.
हा डेटा सेंटर प्रकल्प ठाणेकरांच्या पूर्णपणे मुळावर उठला असून, यामुळे शहराचे पर्यावरणीय नुकसान (Environmental Damage) मोठ्या प्रमाणावर होणार आहे. या अन्यायाविरोधात आम्ही रस्त्यावर उतरून तर संघर्ष करूच, पण त्याचसोबत न्यायालयात जाऊन कायदेशीर लढाही देऊ, असा निर्धार प्रधान यांनी व्यक्त केला.
या नव्या आरोपामुळे ठाण्यातील राजकीय वातावरण कमालीचे तापले असून, टीडीआर घोटाळ्यानंतर आता 'डेटा सेंटर'चा मुद्दा पालिकेसाठी डोकेदुखी ठरणार असल्याचं दिसत आहे.
ही बातमी वाचा:
Before You Go
Sanjay Raut Pune :पंतप्रधान म्हणून यंदा मोदींचा शेवटचा वाढदिवस असेल, संजय राऊतांचं मोठं वक्तव्य
महत्त्वाच्या बातम्या
