मंत्रिमंडळ विस्तारामुळे राऊत-पवार 'सामना' पुढे, पुण्यातील मुलाखत स्थगित

सर्व पार्श्वभूमीवर संजय राऊत आणि शरद पवारांमधील होणाऱ्या या कार्यक्रमाची पुणेकरांसह अवघ्या महाराष्ट्राचे लक्ष लागले होते. मात्र आता अनिश्चितकाळासाठी ही मुलाखत पुढे ढकलली आहे.

मुंबई : राष्ट्रवादीचे अध्यक्ष शरद पवार आणि संजय राऊत यांच्यात रंगला जाणारा 'सामना' पुढे ढकलला आहे. 29 डिसेंबरला संजय राऊत हे शरद पवार यांची मुलाखत घेणार होते. मात्र मंत्रिमंडळाचा विस्तार लांबणीवर पडल्याने ही मुलाखत पुढे ढकलली आहे. ही प्रकट मुलाखत पुणे येथे होणार होती. याबाबत माहिती संजय राऊत यांनी ट्वीट करुन दिली होती. राऊत आणि पवार यांच्या निकटचे संबंध आहेत. राज्यात शिवसेना, राष्ट्रवादी आणि काँग्रेस पक्षांनी एकत्र येत महाविकास आघाडी स्थापन केली आहे. राज्यात सत्ता स्थापन करण्यात राऊत आणि पवार यांनी महत्त्वाची भूमिका निभावली होती. सत्ता स्थापन करण्याआधी राऊत-पवार यांच्यामधील बैठकांकडे देखील राज्याचे लक्ष असायचे. त्यामुळे पवार आणि राऊत यांच्यातील या पुण्यात होणाऱ्या या प्रकट मुलाखतीकडे सर्वांचे लक्ष लागले होते. राऊत कोणते प्रश्न विचारणार आणि त्याला शरद पवार हे कसे उत्तर देणार याची उत्सुकता सर्वांनाच लागली होती. तसेच या मुलाखतीतून अनेक गुपिते उलगडली जाण्याची शक्यता होती. मात्र आता मंत्रिमंडळाचा विस्तार रखडल्याने ही मुलाखत पुढे ढकलली असल्याची माहिती आहे. गेल्यावर्षी मनसे अध्यक्ष राज ठाकरे यांनीही गेल्या शरद पवार यांची पुण्यातच जाहीर मुलाखत घेतली होती. शरद पवार आणि संजय राऊत यांच्यातील सख्य सर्वपरिचीत आहे. महाविकास आघाडीचे सरकार स्थापन होण्याच्या प्रक्रियेत राऊतांनी अनेकदा पवारांची भेट घेतली होती. तसेच पवार समजून घ्यायला शंभर जन्म घ्यावे लागतील, असं देखील राऊत म्हणाले होते. मला शरद पवारांवर अजिबात शंका नाही. भाजपच्या मुंबईतील नेत्याने मध्यंतरी वक्तव्य केलं होतं की नरेंद्र मोदी यांना समजून घ्यायला संजय राऊतांना 25 जन्म लागतील. तसंच मी या देशातल्या सगळ्यांना सांगू इच्छितो, माननीय शरद पवार यांना समजून घ्यायला 100 जन्म लागतील, असं राऊत म्हणाले होते. या सर्व पार्श्वभूमीवर संजय राऊत आणि शरद पवारांमधील होणाऱ्या या कार्यक्रमाची पुणेकरांसह अवघ्या महाराष्ट्राचे लक्ष लागले होते. मात्र आता अनिश्चित काळासाठी ही मुलाखत पुढे ढकलली आहे. संबंधित बातम्या- Pune | पुण्यात पवार आणि संजय राऊत यांच्यात रंगणार 'सामना', 29 डिसेंबरला राऊत घेणार मुलाखत | ABP Majha