एक्स्प्लोर

Walmik Karad Surrender: वाल्मिक कराडच्या एका निर्णयाने सगळेच चक्रावले, सीआयडीसमोर हजर झाल्याने सगळेच संभ्रमात

Walmik Karad Surrender: बीड पोलिस तपास करत असताना वाल्मिक कराड सीआयडीसमोर का झाला हजर? याबाबत अनेक संभ्रम निर्माण झाले आहेत.

By : अंकिता खाणे | Updated at : 31 Dec 2024 02:11 PM (IST)

Walmik Karad Surrender

Source : ANI

Beed Walmik Karad Surrender : बीडच्या खंडणी प्रकरणातील आरोपी वाल्मिक कराड आज अखेर पुण्यातील सीआयडीला शरण आला आहे. पुण्यातील सीआयडी ऑफीसमध्ये कराडने शरणागती पत्करली आहे. आता सीआयडी त्याची कसून चौकशी करणार असून त्याला कोर्टात हजर केलं जाण्याची शक्यता आहे. शरणागती पत्करण्यापूर्वी वाल्मिकीने एक व्हिडिओ शेअर करून मोठा दावा केला आहे. सरपंच संतोष देशमुख यांची हत्या होऊन जवळपास 22 ते 23 दिवस उलटले आहेत. वाल्मिक कराडचं नाव या प्रकरणात आल्यानंतर त्याचा तपास बीड पोलिस घेत होते, मात्र आजच वाल्मिक कराड पोलिसांकडे न जाता पुण्यात सीआयडीसमोर का शरण आला याबाबत संभ्रम निर्माण झाला आहे.

खंडणीचा गुन्हा बीड पोलिसांकडे तर हत्येचा गुन्हा सीआयडीकडे

खंडणीचा गुन्हा बीड पोलिसांकडे आहे आणि हत्येचा गुन्हा सीआयडीकडे आहे. दोन्ही वेगवेगळ्या गुन्ह्यांचा तपास करत आहेत. एकीकडे वाल्मिक कराडने आपल्या व्हिडिओमध्ये सांगितलं, खंडणीचा खोटा गुन्हा त्याच्यावरती लावण्यात आलेला आहे, तर हत्येच्या गुन्ह्यामध्ये आपला काही संबंध नाही या प्रकरणात जे कोणी आरोपी असतील त्यांना पकडावं असं आपल्या व्हिडिओमध्ये वाल्मिक कराड म्हणतो आहे, मग असं असताना तो स्वतःहून सीआयडीच्या हवाली का झाला? बीड पोलीस देखील त्याचा शोध घेत होते. त्यामुळे त्यांनी पुण्यात सीआयडी समोर हजर होणार संभ्रम निर्माण करणार आहे, एकीकडे बीड पोलीस देखील त्याचा शोध घेत असताना त्याने सीआयडी ची निवड का केली असा प्रश्न निर्माण झाला आहे. दरम्यान वाल्मिक कराडला वैद्यकीय तपासणी नंतर केजच्या न्यायालयात हजर केले जाण्याची शक्यता आहे. वाल्मीक कराड वर दाखल खंडणीचा गुन्हा केज पोलीस स्टेशनला आहे.

तर मी शिक्षा भोगायला तयार - वाल्मिक कराड

मी वाल्मीक कराड केज पोलीस स्टेशनमध्ये माझ्या विरोधात खोटी खंडणीची फिर्याद दाखल झाली आहे. मला अटकपूर्व अधिकार असताना मी सीआयडी ऑफिस पुणे पाषाण येथे सरेंडर होत आहे. संतोष देशमुख यांचे जे कोणी मारेकरी असतील त्यांना अटक करावी आणि त्यांना फाशीची शिक्षा द्यावी. राजकीय रोषापोटी माझं नाव त्यांच्याशी जोडले जात आहे, पोलीस तपासाचे निष्कर्ष येतील. त्यात मी जर दोषी दिसलो तर मला शिक्षा द्यावी ती मी भोगायला तयार आहे असं वाल्मीक कराड यांनी स्वतः शेअर केलेल्या व्हिडिओमध्ये म्हटले आहे.