Pune News: सकाळी नेहमीप्रमाणे जीममध्ये व्यायाम केला; पाणी प्यायलं अन् अचानक कोसळला, क्षणार्धात तरूणाचा मृत्यू, पिंपरी चिंचवडमधील धक्कादायक घटना

Pune News: रोज व्यायाम करून स्वतःला फिट आणि व्यवस्थित ठेवण्याचा प्रयत्न करणाऱ्या एका 37 वर्षीय तरुणाचा जीममध्येच हृदयविकाराच्या झटक्याने मृत्यू झाला.

Pune News

Source : PTI

पिंपरी चिंचवड: पिंपरी चिंचवडमधून एक धक्कादायक बातमी समोर आली आहे. जिममध्ये व्यायाम करतानाच एका तरुणाचा दुर्दैवी मृत्यू झाल्याची माहिती समोर आली आहे. चिंचवडगावातील नायट्रो जिममध्ये व्यायाम करत असताना मिलिंद कुलकर्णी या तरुणाचा मृत्यू झाला आहे.  व्यायाम करत असताना त्यांना अचानकपणे भोवळ आली आणि ते जागेवर कोसळले. त्यांना तातडीने जवळ असलेल्या मोरया हॉस्पिटलमध्ये दाखल केले मात्र, उपचारापूर्वीच त्यांचे निधन झाल्याचे डॉक्टरांनी सांगितले. हृदयविकाराच्या झटक्याने मिलिंद कुलकर्णी यांचं निधन झाल्याचा प्राथमिक अंदाज व्यक्त करण्यात आला आहे. या घटनेनं हळहळ व्यक्त होत आहे. रोज व्यायाम करून स्वतःला फिट आणि व्यवस्थित ठेवण्याचा प्रयत्न करणाऱ्या एका 37 वर्षीय तरुणाचा जीममध्येच हृदयविकाराच्या झटक्याने मृत्यू झाला. 

नेमकं काय घडलं?

या प्रकरणी मिळालेल्या माहितीनुसार, मिलिंद कुलकर्णी हे गेल्या सहा महिन्यांपासून चिंचवड गावातील एका  नायट्रो जिममध्ये जात होते. आज सकाळी नेहमीप्रमाणे त्यांनी जीममध्ये व्यायाम केला. त्यानंतर ते एका ठिकाणी बसले आणि त्यांनी पाणी प्यायलं. मात्र, काही सेकंदांतच त्यांना अचानक भोवळ आली आणि ते खाली कोसळले. यावेळी जीममध्ये असलेल्यांनी या प्रकारानंतर त्यांना तातडीने जवळच्या रुग्णालयात दाखल केलं, मात्र, तोपर्यंत खूप उशीर झाला होता. डॉक्टरांनी त्यांना तपासून मृत घोषित केलं. मिलिंद कुलकर्णी यांचा मृत्यू हृदयविकाराच्या झटक्याने झाल्याचा प्राथमिक अंदाज व्यक्त करण्यात आला आहे.

एका वृत्तसंस्थेने दिलेल्या माहितीनुसार, मृत मिलिंद कुलकर्णी यांच्या पत्नी स्वतः एक डॉक्टर आहेत. तरुण वयात हृदयविकाराच्या झटक्याने होणाऱ्या मृत्यूचे वाढते प्रमाण ही एक गंभीर समस्या बनली आहे.तज्ज्ञांच्या मतानुसार, कोणत्याही प्रकारचा व्यायाम सुरू करण्यापूर्वी पूर्ण आरोग्य तपासणी करणे गरजेचे आहे. योग्य काळजी आणि तपासणी करूनच कोणताही  व्यायामाला सुरूवात करणे गरजेचे आहे. या घटनेनंतर सर्वत्र हळहळ व्यक्त होत आहे.