पुणे : ललित कला केंद्राचे प्रमुख डॉक्टर प्रविण भोळे यांच्यासह सहा जणांना नाटकाबाबत अटक (Savitribai Phule Pune University) करण्यात आली आहे. सावित्रीबाई फुले पुणे विद्यापीठाच्या ललित कला केंद्रातील विद्यार्थ्यांकडून 'जब वी मेट' हे प्रायोगिक नाटक काल सादर करण्यात आलं आहे. या नाटकात रामायणात काम करणाऱ्या नाट्य कलावंतांचे खाजगी आयुष्य दाखवण्यात आले होते.
ललित कला केंद्राचा विद्यार्थी असलेल्या भावेष राजेंद्रने या नाटकाचे लेखन आणि दिग्दर्शन केले होते. मात्र नाटकातील संवादांना अखिल भारतीय विद्यार्थी परिषदेकडून आक्षेप घेण्यात आला आणि नाटक बंद पाडण्यात आले. त्यानंतर अखिल भारतीय विद्यार्थी परिषदेकडून नाटकाशी संबंधित व्यक्तीविरुद्ध तक्रार दाखल करण्यात आली. त्यानंतर नाटकाचे दिग्दर्शक, काम करणारे कलावंत यांच्यासह ललित कला केंद्राचे प्रमुख डॉक्टर प्रविण भोळे यांना अटक करण्यात आलीय. दुपारी न्यायालयात त्यांना हजर करण्यात येईल.
नेमकं काय घडलं होतं?
सावित्रीबाई फुले पुणे विद्यापीठातील ललित कला केंद्रातील विद्यार्थ्यांकडून 2 फेब्रुवारीला रामायणात काम करणाऱ्या कलाकारांच्या आयुष्यावर आधारित एका नाटकाच्या प्रयोगाचे आयोजन करण्यात आले होते. जब वी मेट या नावाच्या या नाटकात रामायणात काम करणाऱ्या कलाकारांचे वैयक्तिक आयुष्य दाखवण्याचा प्रयत्न आला होता. मात्र या नाटकातील संवादांना अखिल भारतीय विद्यार्थी परिषदेच्या कार्यकर्त्यांनी आक्षेप घेतला आणि नाटकाचा प्रयोग उधळून लावला. यावेळी नाटकात काम करणाऱ्या विद्यार्थ्यांना मारहाण देखील करण्यात आली. या नाटकांत राम आणि सीता यांच्यासंदर्भात काही आक्षेपार्ह दृष्य दाखवण्यात आली होती. त्यामुळे हा सगळा राडा झाला.
चालू नाटक बंद पाडणे योग्य नाही: विभावरी देशपांडे
या प्रकरणावर आता कलाक्षेत्रातील काहींनी आपलं मत सोशल मीडियावर व्यक्त केलं आहे. अभिनेत्री विभावरी देशपांडे यांनी चालू नाटक बंद पाडणे, गोंधळ घालणे , धक्काबुक्की करणे योग्य नाही, असं मत व्यक्त केलं आहे. 'एखादी कलाकृती, कलाविष्कार न पटणे, न आवडणे, राग येणे, भावना दुखावणे हे मला मान्य आहे. तो निषेध व्यक्त करण्याचे विविध मार्ग लोकशाही व्यवस्थेत आहेत. चालू नाटक बंद पाडणे, गोंधळ घालणे , धक्काबुक्की करणे योग्य नाही', असं त्यांनी फेसबूक पोस्टमध्ये लिहिलं आहे.
कुलगुरूंनी भूमिका मांडावी; मनसे चित्रपटसेना आक्रमक
त्यासोबत मनसे चित्रपट सेनेनेदेखील आता या प्रकरणात उडी घेतली आहे. त्यांनी घडलेल्या प्रकाराला थेट विरोध केला आहे. नाटक करणाऱ्यांवर कठोर कारवाई झाली पाहिजे, अशी आक्रमक भूमिका मनसे चित्रपटसेनेचे पुण्याचे शहराध्यक्ष चेतन धोत्रे यांनी घेतली आहे. शिवाय या सगळ्या प्रकरणावर विद्यापीठाचे कूलगुरूंनी योग्य भूमिका मांडावी, अशी मागणी फेसबूक पोस्ट करत केली आहे. तुमचे अभिव्यक्ती स्वातंत्र्य तुमच्या घरात ठेवा. सार्वजनिक ठिकाणी नाही. याचे भान ठेवून विद्यापीठात वागा. हीच वाक्ये मुस्लिम अथवा ख्रिश्चन पंथातील देवतांच्या तोंडातून सांगायचे धाडस यांच्यात आहे काय ?अभिव्यक्ती स्वातंत्र्य फक्त हिंदू धर्मातील देवतांच्या तोंडात शिव्या देऊनच मिळते काय ? इतके सगळे होऊन सुद्धा कुलगुरूंनी त्यांची भूमिका मांडली नाही. आता फक्त त्यांच्या प्रतिक्रियेची प्रतिक्षा आहे. दोषींवर कडक कारवाई व्हायला हवी, असं चेतन धोत्रे यांनी फेसबुक पोस्टमध्ये लिहिलं आहे.
इतर महत्वाची बातमी-
Pune News : पुणे विद्यापीठ चौकाजवळ मालवाहू ट्रेलर उलटला; मोठ्या प्रमाणात वाहतूक कोंडी, वाहतुकीत बदल