P B Sawant | निवृत्त न्यायमूर्ती पी. बी. सावंत यांचं वृद्धापकाळानं निधन

निवृत्त न्यायमूर्ती पी. बी. सावंत यांचं वृद्धपकाळनं निधन झालं असून ते 91 वर्षांचे होते. उद्या सकाळी बाणेरमध्ये त्यांच्यावर अंत्यसंस्कार करण्यात येणार आहेत. न्यायमूर्ती म्हणून पी. बी. सावंत यांच्याकडून अनेक ऐतिहासिक निकाल देण्यात आले होते.

पुणे : निवृत्त न्यायमूर्ती पी. बी. सावंत यांचं वृद्धपकाळनं निधन झालं आहे. वयाच्या 91व्या वर्षी पुण्यातील राहत्या घरी त्यांनी अखेरचा श्वास घेतला. उद्या सकाळी बाणेरमध्ये त्यांच्यावर अंत्यसंस्कार करण्यात येणार आहेत. पुण्यातील पहिली एल्गार परिषद पी. बी. सावंत यांच्याच अध्यक्षतेखाली पार पडली होती. न्यायमूर्ती म्हणून पी. बी. सावंत यांच्याकडून अनेक ऐतिहासिक निकाल देण्यात आले होते.

पी. बी सावंत यांनी मुंबई विद्यापीठातून कायद्याची पदवी घेतली होती. त्यानंतर त्यांनी मुंबई हायकोर्ट, सुप्रीम हायकोर्टात न्यायाधीश म्हणून काम पाहिलं. पी. बी. सावंत 1989 ते 1995 या काळात सुप्रीम कोर्टात न्यायमूर्ती होते. 1995 मध्ये ते निवृत्त झाले होते. सेवानिवृत्त झाल्यानंतरही पी. बी. सावंत सामाजिक कार्यक्रमांमध्ये सक्रीय होते. तसेच आग्रहानं भूमिका मांडत होते. वर्ल्ड प्रेस काऊन्सिल आणि प्रेस कऊन्सिल ऑफ इंडियाचे अध्यक्ष म्हणून देखील त्यांनी काही काळ काम पाहिलं. तसेच यादरम्यान लोकशासन आंदोलन पार्टीचे संस्थापक म्हणून मोठ्या प्रमाणावर त्यांनी काम केलं होतं.

पाहा व्हिडीओ : P B Sawant | निवृत्त न्यायमूर्ती पी. बी. सावंत यांचं वृद्धपकाळनं निधन

पी. बी. सावंत यांच्या अध्यक्षतेखाली पुण्यातील पहिली एल्गार परिषद पार पडली होती. तसेच मराठा समाजाला आरक्षण मिळावं यासाठी नेमण्यात आलेल्या समन्वय समितीचे देखील ते सुरुवातीच्या काळात अध्यक्ष होते. मात्र प्रकृतीच्या कारणांमुळे ते सार्वजनिक जबाबदाऱ्यांमधून दूर होत गेले. गोध्रा दंगलीप्रकरणी स्थापित तीन सदस्यीय ट्रिब्युनलचे देखील ते सदस्य होते. तसेच इंदिरा साहनी खटल्यात मंडल आयोगाच्या शिफारसींनुसार आरक्षण लागू करण्यात आलं, त्या खंडपीठातही न्यायमूर्ती पी. बी. सावंत यांचा समावेश होता.