पुणे : ट्रेकिंग करताना लडाखमधल्या स्टोक कांग्री शिखराजवळ कोसळलेल्या पुण्याच्या पद्मेश पाटीलची प्रकृती चिंताजनक आहे. त्याच्यावर सध्या चंदीगढमधल्या लष्कराच्या रुग्णालयात उपचार सुरु आहेत. लडाखच्या कुशीत 20 हजार फूट उंचीवर वसलेला आणि भल्या भल्या ट्रेकर्सना आव्हान देणारं स्टोक कांग्री शिखर. पुण्याचा पद्मेश पाटील आणि त्याच्या दोन मित्रांनीही स्टोक क्रांगी सर करायचं आवाहन स्वीकारलं. 9 ऑगस्टला प्रवास सुरु झाला. अथक चढाईनंतर पद्मेश आणि त्याचे मित्र स्टोट क्रांगीच्या पायथ्याशी पोहोचले. मात्र हवामान खराब झाल्यामुळं मित्रांनी पुढे न जाण्याचं ठरवलं. पद्मेशला मात्र शिखर खुणावत होतं. मित्रांना मागे सोडून त्यानं एकट्यानंच ट्रेकिंग करायचं ठरवलं. त्यानं जवळपास 18 हजार फुटापर्यंत यशस्वी चढाई केली. 15 ऑगस्टचा दिवस होता. स्टोक कांग्री पद्मेश पाटीलपासून फक्त 2 हजार फूट दूर होतं. मात्र ऑक्सिजनच्या कमतरतेमुळे पद्मेशच्या फुफ्फुसात पाणी जमा झालं. तशा अवस्थेत तो 1 हजार फूट खोलवर कोसळला.

पुण्यातील तरुण लडाखमध्ये दरीत कोसळून गंभीर जखमी

पद्मेशच्या अपघाताची माहिती मिळताच, त्याच्या मित्रांनी सैन्याच्या अधिकाऱ्यांची मदत घेतली. हेलिकॉप्टरच्या सहाय्यानं त्याला लेहमधल्या हॉस्पिटलमध्ये दाखल करण्यात आलं. मात्र पद्मेशची परिस्थिती खालावत चालल्यामुळे त्याला अद्यावत रुग्णालयामध्ये भरती करणं गरजेचं होतं. एबीपी माझानं पद्मेशच्या मदतीसाठी आवाहन केलं. पुण्यातल्या भाजप नेत्यानं मुख्यमंत्री कार्यालयाला या घटनेची माहिती दिली. त्यानंतर वायुवेगानं सूत्र फिरली. मुख्यमंत्री कार्यालयाकडून संरक्षण राज्यमंत्री सुभाष भामरेंशी संपर्क साधण्यात आला. भामरेंच्या आदेशानंतर पद्मेशला चंदीगडमधल्या लष्कराच्या हॉस्पिटलमध्ये दाखल करण्यात आलं. चंदीगढमधल्या लष्करी हॉस्पिटलमध्ये दाखल झाल्यानंतरही पद्मेशसमोरच्या अडचणी काही संपल्या नाहीत. पद्मेश प्रमाणे अनेक उत्साही तरुण धाडसी ट्रेकिंग करतात. त्यात गैर काहीच नाही, मात्र धाडस दाखवताना योग्य ती खबरदारी घेतली पाहिजे. जर पद्मेशनंही योग्य ती काळजी घेतली असती तर कदाचित तो या संकटातून बचावला असता.