Hunting turtles Daund : कासवाची शिकार महागात पडली; आरोपींना 25 ऑक्टोबरपर्यंत कोठडी

दौंड तालुक्यातील वरवंड गावात कासव शिकार प्रकरणी आरोपींना 25 ऑक्टोबरपर्यंत कोठडी सुनावण्यात आली आहे.दौंड वनपरिक्षेत्रातील मौजे वरवंड येथील कानिफनाथ नगर भागात कासव शिकार प्रकरणातील आरोपींना न्यायलयाने वन कोठडी सुनावली आहे.

turle

Hunting turtles Daund :  दौंड (daund) तालुक्यातील वरवंड गावात कासव (turtles)  शिकार प्रकरणी आरोपींना 25 ऑक्टोबरपर्यंत कोठडी सुनावण्यात आली आहे. वनविभाग पुणे अंतर्गत दौंड वनपरिक्षेत्रातील मौजे वरवंड येथील कानिफनाथ नगर भागात कासव शिकार प्रकरणातील आरोपींना न्यायालयाने वन कोठडी (फॉरेस्ट कस्टडी) सुनावली आहे. दादा सावंत आणि नाना सावंत या दोघांना कासव भाजून खायचं होतं. त्यामुळे दोघांनी मिळून कासवाची शिकार करण्याचा कट रचला. त्यानुसार दोघांनी मिळून कासवाला घरी आणले. या सगळ्याची माहिती एका व्यक्तीने वन विभागाला दिली होती. त्यानुसार त्यांच्यावर कारवाई करण्यात आली आहे. 

या प्रकाराची माहिती कळताच वनविभागाचे कर्मचारी या दोघांच्या घरी पोहोचले. त्यांच्या घराची झडती घेतली असता कासवाचे तुकडे सापडले आणि घराबाहेर कासवाचे कवच देखील सापडले. त्यानुसार पोलिसांनी दोघांची चौकशी केली असता दोघांनी कासव भाजून खाण्यासाठी कासवाची शिकार केल्याची कबुली दिली. त्यावरुन वन खात्याने नाना सावंत आणि दादा सावंत यांच्या विरोधात वन्यजीव अधिनियम कायद्याअंतर्गत गुन्हा नोंद केला असून आरोपींना अटक केली होती. कासव हा वन्यप्राणी भारतीय वन्यजीव अधिनियम 1972 च्या परिशिष्ठ 1 च्या भाग-2 मधील वन्यप्राणी असल्याने दादा नाना सावंत, नाना धर्मा सावंत, भिमराव रामभाऊ सावंत आणि शंकर दत्तू सावंत यांच्यावर भारतीय वन्यजीव वनगुन्हा नोंदवून त्यांना प्रथम वर्ग न्यायदंडाधिकारी दौंड यांच्या न्यायालयात हजर करण्यात आले होते.

व्हाॅट्सअॅपवर पाठवला होता व्हिडीओ
खाण्यासाठी कासवाची शिकार केली जात आहे असं कळताच एक व्यक्तीने वनपाल यांना या सगळ्या प्रकाराचा व्हिडीओ करुन व्हाॅट्सअॅपवर पाठवला होता. हा व्हिडीओ पाहून वन अधिकारी आणि वनपाल यांनी ही कारवाई करण्याचा निर्णय घेतला. या व्यक्तीकडून संपूर्ण माहिती गोळा केली. त्यानुसार कारवाई केली होती. 

न्यायालयाने त्यांना 25 ऑक्टोबरपर्यंत वन कोठडी सुनावली आहे. आरोपीस कठोरात कठोर शिक्षा होण्यासाठी आवश्यक कार्यवाही करण्याचे आदेश पुणे वनविभागाचे उपवनसंरक्षक राहुल पाटील यांनी आदेश दिले असून या प्रकरणी सहायक वनसंरक्षक दीपक पवार आणि वनपरिक्षेत्र अधिकारी कल्याणी गोडसे हे अधिक तपास करत आहेत.

शिकाऱ्याला 3 ते 5 वर्षापर्यंत शिक्षेची तरतूद
भारतीय वन्यजीव अधिनियमातील तरतुदींनुसार वन्यप्राण्यांची शिकार करणाऱ्यांवर 3 ते 7 वर्षापर्यंत शिक्षेची तरतूद असून कोणीही वन्यप्राण्याची शिकार करु नये अथवा त्यांच्या जिवाशी खेळू नये. नागरिकांना कुठेही वन्यप्राण्याची शिकार करताना एखादी व्यक्ती आढळून आल्यास तात्काळ वनविभागाच्या हेल्पलाईन क्र.1926 वर संपर्क साधण्याचे आवाहन उपवनसंरक्षकांनी केले आहे.