मद्यधुंद कारचालकाचा ताबा सुटला, पुण्यात पुन्हा भीषण अपघात, 9 वाहनांना जोरदार धडक

Pune Accident: कारचालकाने मद्यप्राशन केल्याने त्याचे वाहनावरील नियंत्रण सुटले. त्यामुळे त्याने अनेक वाहनांना धडक दिली.

Pune Accident

Source : pixabay

Pune Accident:पुण्यातील अपघाताचं सत्र सुरुच असून वाघोली झालेल्या भीषण अपघातानंतर आता पुण्यात पुन्हा एक विचित्र अपघात झाला आहे.पुण्यातील चतु:शृंगी पोलीस स्टेशनच्या हद्दीत एका मद्यधुंद कार चालकाने  9 वाहनांना धडक दिल्याने मोठा अपघात झाला. या विचित्र अपघातात एका तरुणाला गंभीर दुखापत झाली असून, इतर वाहनांचे मोठ्या प्रमाणावर नुकसान झाले आहे. सुदैवाने, या घटनेत जीवित हानी झालेली नाही. हा अपघात शहराच्या मध्यवर्ती भागातून जाताना घडला. दयानंद केदारी असे मद्यधुंद अवस्थेत गाडी चालवणाऱ्या कारचालकाचे नाव आहे. पुणे पोलिसांनी त्याला ताब्यात घेतले असून, त्याच्यावर संबंधित कायदेशीर कारवाई सुरू केली आहे.

घटनेनुसार, कारचालकाने मद्यप्राशन केल्याने त्याचे वाहनावरील नियंत्रण सुटले. त्यामुळे त्याने अनेक वाहनांना धडक दिली. अपघातात वाहनांचे मोठ्या प्रमाणावर नुकसान झाले असून, घटनास्थळावर मोठी वाहतूक कोंडी झाली होती. नागरिकांच्या सतर्कतेमुळे मोठा अनर्थ टळला, असे प्रत्यक्षदर्शींनी सांगितले. अपघाताची माहिती मिळताच चतु:शृंगी पोलीस घटनास्थळी दाखल झाले आणि परिस्थिती नियंत्रणात आणली. जखमी तरुणाला तातडीने रुग्णालयात दाखल करण्यात आले असून, त्याच्यावर उपचार सुरू आहेत.या अपघातामुळे वाहनचालकांना वाहतुकीच्या नियमांचे पालन करण्याचे महत्त्व अधोरेखित झाले आहे. पुणे पोलिसांनी अपघातग्रस्त भागातील वाहतूक सुरळीत करण्यासाठी तातडीने प्रयत्न केले असून, या घटनेचा पुढील तपास सुरू आहे.

लक्झरी बस आणि ट्रकची धडक एक ठार 15-20 जखमी

वाघोलीत झालेल्या भीषण अपघातानंतर आता पुणे-सोलापूर महामार्गावर पुण्याच्या दिशेने जाणाऱ्या लक्झरी बस आणि ट्रकचा भीषण अपघात झाला. या अपघातात एका व्यक्तीचा मृत्यू झाला असून, 15 ते 20 जण जखमी झाल्याची माहिती समोर आली आहे. हा अपघात पहाटे चार वाजण्याच्या सुमारास दौंड तालुक्यातील खडकीजवळील विसावा हॉटेलजवळ झाला. नेमका अपघात कशामुळे झाला याचे कारण अद्याप स्पष्ट झालेले नाही. मात्र, लक्झरी बसने ट्रकला पाठीमागून धडक दिल्याचा प्राथमिक अंदाज वर्तवला जात आहे. अपघातात जखमी झालेल्या प्रवाशांना तत्काळ मदत कार्य सुरू करून भिगवण येथील खाजगी रुग्णालयात उपचारासाठी दाखल करण्यात आले आहे.या घटनेने महामार्गावरील वाहतूक काही काळासाठी विस्कळीत झाली होती.

जखमींच्या स्थितीवर लक्ष

महामार्गावर झालेल्या या अपघातामुळे वाहतूक काही काळासाठी विस्कळीत झाली होती. घटनास्थळी वाहतूक सुरळीत करण्यासाठी पोलिसांनी अवघ्या काही तासांत कार्यवाही केली.अपघाताची अधिक माहिती मिळवण्यासाठी पोलिसांकडून तपास सुरू आहे. यातील जखमींच्या स्थितीवर लक्ष ठेवले जात असून, पोलिसांचा प्राथमिक अंदाज आहे की, अपघात ट्रक आणि बसच्या वेगाच्या तफावतीमुळे झाला असावा.या अपघाताने पुणे-सोलापूर महामार्गावर सुरक्षा नियमांचे पालन आणि वाहतूक नियंत्रण किती महत्त्वाचे आहे, हे पुन्हा एकदा दाखवून दिले आहे.