LIVE : नयना गँगरेप प्रकरणी वकिलांकडून निर्भयाचा दाखला

पुणे : पुण्यातील नयना पुजारी बलात्कार आणि हत्येप्रकरणी तिन्ही दोषींना शिक्षा सुनावली जाणार आहे. आरोपी योगेश राऊत, महेश ठाकूर आणि विश्वास कदम या तिघांवर बलात्कार, हत्या, अपहरण आणि चोरीचा आरोप सिद्ध झाला आहे. माफीचा साक्षीदार राजेश चौधरीची सुटका करण्यात आली. कोर्टात काय झालं? शिक्षेची सुनावणी सकाळी 11 वाजता होणार होती. मात्र पोलिसांनी तासभर आधीच आरोपींना कोर्टात हजर केलं होतं. न्यायाधीशांनी योगेश राऊतला समोर बोलावून 'शिक्षेबद्दल काही बोलायचं आहे का?' असं विचारलं. 'मला या गुन्ह्यात गोवण्यात आलं आहे. मी गुन्हा केलेला नाही. गुन्ह्यात वापरलेली गाडी त्या दिवशी माझ्याकडे नव्हती. मला एक मुलगी, पत्नी आणि आई आहे. शिक्षा देताना त्याचा विचार व्हावा.' असं योगेश म्हणाला. 'माफीचा साक्षीदार झालेला राजेश चौधरीही गुन्ह्यात सहभागी होता. आम्हाला जर शिक्षा द्यायची असेल तर त्यालाही द्या.' अशी मागणीही योगेश राऊतने केली. महेश ठाकूरलाही न्यायाधीशांनी पुढे बोलावून शिक्षेबाबत विचारलं, मात्र त्यांनी बोलण्यास नकार दिला. विश्वास कदमला विचारलं असता हा गुन्हा माफीचा साक्षीदार झालेल्या राजेश चौधरीने केल्याचा दावा त्याने केला. त्यामुळे राजेश चौधरीलाही शिक्षा देण्याची मागणी विश्वास कदमने केली. तिन्ही आरोपींना फाशीची शिक्षा देण्याची मागणी करताना सरकारी वकील हर्षद निंबाळकर यांनी यापूर्वी घडलेल्या अनेक प्रकरणांचे आणि त्यामध्ये न्यायालयाने सुनावलेल्या फाशीच्या शिक्षेचे दाखले दिले. सरतेशेवटी मागील आठवड्यात सर्वोच्च न्यायालयाने दिल्लीतील निर्भया प्रकरणात सुनावलेल्या शिक्षेचा दाखला दिला.

नयना पुजारी बलात्कार-हत्या प्रकरणी आरोपी योगेश कसा अडकला?

काय आहे प्रकरण? सिनिक्रॉन या कंपनीत सॉफ्टवेअर इंजिनियर म्हणून कार्यरत असलेल्या नयना पुजारीचं लिफ्ट देण्याच्या बहाण्याने 7 ऑक्टोबर 2009 रोजी अपहरण करण्यात आलं होतं. त्यानंतर नयनावर बलात्कार करुन तिची हत्या करण्यात आली होती. शिवाजीनगरच्या सत्र न्यायालयात ही सुनावणी होणार आहे.

नयना पुजारी हत्याकांड: बलात्कार, खून, अपहरणाचे आरोप सिद्ध

योगेश राऊत या मुख्य आरोपीला अटक केल्यानंतर या खटल्याला सुरुवात झाली. गेल्या सात वर्षांपासून या खटल्याची सुनावणी सुरु होती. अटकेनंतर एकदा योगेश राऊत रुग्णालयातून पळून गेला होता. दीड वर्षं दिल्लीत वेशांतर करुन राहणाऱ्या योगेशला शिर्डीमध्ये पोलिसांनी अटक केली होती. दोषींना कठोरात कठोर शिक्षा व्हावी, अशी मागणी नयनाचे पती अभिजीत पुजारींसह तिच्या कुटुंबीयांनी केली आहे. पोलिसांच्या ढिसाळपणावर ताशेरे ओढत न्यायाधीशांनी आरोपींना न्यायालयात आणण्याची जबाबदारी असलेल्या पोलिसांना नोटीस बजावण्याचे आदेश दिले.