पुण्यातील प्रेमवीराचा प्रताप; प्रेयसी रिक्षावाल्यासोबत पळाल्याने तब्बत 80 रिक्षावाल्यांचे मोबाईल चोरले

आसिफची प्रेयसी ही मूळची गुजरातची आहे. दोघांची लव्हस्टोरी चांगली सुरू होती. पण अचानक त्याच्या प्रेयसीचे काही महिन्यांपूर्वी एका रिक्षाचालकासोबत प्रेमसंबंध जुळले आणि ती त्याच्यासोबत पळून गेली.

पुणे : एका रिक्षाचालकाने आपल्या प्रेयसीला पळून गेल्याने संतप्त झालेल्या प्रियकराने असा काही प्रकार केलाय की सर्वांनाच धक्का बसला आहे. संतालेल्या या प्रियकराने एका रिक्षाचालकाने प्रेयसीला पळवून नेलं म्हणून सर्वच रिक्षाचालकांना जणू टार्गेट केलं. तब्बल 80 रिक्षाचालकांचे मोबाईल त्याने लंपास केल्याचा प्रकार उघडकीस आला आहे. लष्कर पोलिसांनी या प्रेमवीर चोरट्याला जेरबंद केले आहे.

आरोपील ताब्यात घेतल्यानंतर त्याच्याकडे अधिक चौकशी केली असता त्याने दिलेले उत्तर ऐकून पोलीस अधिकाऱ्याने डोक्याला हात लावला. आसिफ उर्फ बोहरा शेख असं या चोरट्याचं नाव आहे. त्याने चोरलेले सगळे मोबाईल फोन हे रिक्षाचालकांचे आहेत.

आसिफची प्रेयसी ही मूळची गुजरातची आहे. दोघांची लव्हस्टोरी चांगली सुरू होती. पण अचानक त्याच्या प्रेयसीचे काही महिन्यांपूर्वी एका रिक्षाचालकासोबत प्रेमसंबंध जुळले. याची खबर आसिफला लागायच्या आत तिने त्या रिक्षासोबत पळ काढला होता. आपली प्रेयसी एका रिक्षाचालकासोबत पळून गेली हे ऐकून आसिफला जबर धक्का बसला.

आसिफला प्रेयसीचा राग तर होताच पण रिक्षाचालकांची त्याला चीड आली. त्यामुळे त्याच रागाने चिडून जाऊन त्याने रिक्षाचालकांना टार्गेट करण्यास सुरुवात केली. त्यानुसार त्याने आतापर्यंत 80 रिक्षाचालकांचे मोबाईल चोरले आहेत. प्रेमभंग झाल्यामुळे गुन्हेगारी मार्ग पत्कारणे आसिफला आता महागात पडले आहे. अखेर पोलिसांनी आसिफला अटक केली आहे. या प्रकरणाचा अधिक तपास लष्कर पोलीस स्टेशनचे वरिष्ठ पोलीस निरिक्षक चंद्रशेखर भोसले करत आहे.