पुणे विद्यापीठातील डीएसकेंच्या धड्यावर राष्ट्रवादीचा आक्षेप

वाणिज्य शाखेच्या पाठ्यपुस्तकात असलेल्या डी एस कुलकर्णींच्या कारकीर्दीवरील धड्याचं काय करायचं, असा प्रश्न सावित्रीबाई फुले पुणे विद्यापीठासमोर उभा ठाकला आहे.

पुणे : बांधकाम व्यावसायिक डी एस कुलकर्णी यांच्यामुळे सावित्रीबाई फुले पुणे विद्यापीठासमोर मोठं प्रश्नचिन्ह निर्माण झालं आहे. पाठ्यपुस्तकात डीएसकेंच्या कारकीर्दीवर आधारित धड्याचं काय करायचं, असा प्रश्न विद्यापीठासमोर उभा ठाकला आहे. सावित्रीबाई फुले पुणे विद्यापीठातील वाणिज्य विभागाच्या अभ्यासक्रमात 'वास्तू उद्योगाचे अग्रणी डी. एस. कुलकर्णी' अशा मथळ्याखाली एक धडा आहे. हे पुस्तक 15 जून 2013 साली छापण्यात आलं होतं. आता डीएसके यांच्यावर गुंतवणूकदारांची फसवणूक केल्यासह अनेक आरोप झाले आहेत. त्यामुळे मुलांनी या धड्यातून काय शिकायचं, काय बोध घ्यायचा, असा सवाल राष्ट्रवादी काँग्रेसचे आमदार हेमंत टकले यांनी केला आहे. राज्य सरकारने हा धडा नाही तर पूर्ण पुस्तक मागे घ्यावं, त्याची पुनर्तपासणी करावी अशी मागणीही टकले यांनी केली आहे.

काय आहे डीएसके घोटाळा?

डीएसकेंवर गुंतवणूकदारांची फसवणूक करत तब्बल 2 हजार 43 कोटींच्या घोटाळा केल्याचा ठपका ठेवण्यात आला आहे. याप्रकरणी कुलकर्णी दाम्पत्यावर 36 हजार 875 पानांचं दोषारोपपत्र दाखल करण्यात आलं आहे. डीएसके आणि हेमंती यांना 17 फेब्रुवारीला अटक झाली होती. आधी दोघंही पोलिस कोठडीमधे होते, त्यानंतर त्यांना न्यायालयीन कोठडी सुनावण्यात आल्यामुळे दोघांची रवानगी येरवडा कारागृहात करण्यात आली.

डीएसके आणि त्यांची पत्नी हेमंती यांनी केलेल्या पैशांच्या गैरव्यवहारात आणखी तिघांचाही समावेश असल्याचं उघड झालं होतं. डीएसकेंच्या भावाचा जावई केदार वांजपे, त्याची पत्नी (डीएसकेंची पुतणी) सई वांजपे आणि डीएसके कंपनीचा सीईओ धनंजय पाचपोर यांना आर्थिक गुन्हे शाखेनं अटक केली होती. केदार वांजपे हा डीएसकेंच्या कंपनीचा व्यवस्थापकीय संचालक होता. ड्रीम सिटीचं अधिग्रहण करण्यात त्याने महत्वाची भूमिका बजावली होती. त्यानंतर डीएसकेंच्या मेहुणीलाही अटक झाली.